NRK Meny
Normal

Aldri har likestillinga vore betre i bystyret

Historisk bystyremøte i dag: Aldri har kvinnedelen vore større i bystyret i Noregs nest største by.

Hilde Boberg Andresen og Anine Frølich

UNGE TILSKOT: Hilde Boberg Andresen (SV) og Anine Frølich (H) er nye fjes i bystyret i Bergen.

Foto: Sølve Rydland / NRK

Kjønnsbalansen i bystyresalen i Bergen kunne nesten ikkje vore jamnare, når 67 politikarar i dag samlast til det første møtet for det nye bystyret.

32 kvinner og 35 menn er valde inn til å sitje i bystyret i Bergen, ei historisk likestilt fordeling.

– Eg synest det er heilt fantastisk, seier nyvalt bystyrerepresentant Anine Frølich (H).

Unge kvinner drar snittet opp

Ho og Hilde Boberg Andresen (SV) møtast på Nygårdshøyden i Bergen, der dei begge studerer.

I dag er dei to 21-åringane ein del av ein aldri så liten kvinnerevolusjon i Bergen bystyre.

Åtte av dei ti folkevalte under 25 år er kvinner. Dei bidrar til å løfte kvinnedelen i bystyret i byen opp på eit historisk høgt nivå.

Bergen bystyre

GOD BALANSE: I det nye bystyret i Bergen er det 33 kvinner og 34 menn. Det er så jamt kjønnsbalansen kan bli.

Foto: Sølve Rydland / NRK

– Eg kjem jo frå Høgre, og vi har hatt mange politiske førebilete: Erna Solberg, Monica Mæland, Hilde Onarheim og Trude Drevland. Sterke kvinner som har bidratt til å motivere jenter i Unge Høgre, seier Frølich.

– Ikkje tilfeldig

– Det betyr kanskje at vi som har arbeidd for å få fleire kvinner inn i folkevalde verv har gjort noko riktig. Det er kjempebra, og eg håpar det fører til at fleire jenter har lyst til å vere aktive i politikken. Men ideelt sett burde det jo ikkje vere noko å jubla for og det hadde jo vore gøy om kvinnene var i fleirtal, seier Boberg Andresen.

Frølich meiner det ikkje er tilfeldig at ein ser så god kjønnsbalanse i Bergen.

– Først og fremst tyder dette på at partia har blitt merksame på dette og har vore flinkare til å ei jamnare fordeling på toppen av listene, i tillegg til at veljarane har stemt fram kvinner.

Forskjellig feminisme

Feminisme og likestilling er viktig for dei to nykomarane, men her skin det også igjennom at Høgre-politikaren og SV-politikaren er motstandarar.

– Eg er nok meir for ein aktiv kvinnepolitikk. Til eksempel er eg for at ein skal ha sjølvforsvarskurs og for kvotering slik at kvinner skal vere godt representert. Der kjem vi til å vere ueinige, seier Boberg Andresen.

– Denne diskusjonen har vi tatt mange gongar. Det er slike debattar vi kjem til å ta mange gongar framover også, seier Frølich.

Monica Mæland

FØREBILETE: Mangeårig byrådsleiar i Bergen, Monica Mæland (H), er no næringsminister i Solberg-regjeringa. Anine Frølich nemner både Mæland og Solberg som politiske førebilete som kan ha bidratt til at motivere fleire jenter i Unge Høgre.

Foto: Pedersen, Terje / NTB scanpix

Trur dei unge kvinnene vil merkast

At så mange unge kvinner tar sin plass i bergenspolitikken, trur dei to er ein fordel.

– Det er viktig for kvinner som gruppe. Eg trur også menn som har vore lenge i politikken kjem til å merke at det er fleire sterke kvinner som har dukka opp, seier Frølich.

– Eg merkar at no når eg kjem inn som ny, er det herleg at det også finst andre unge jenter der. Dei kan eg identifisere meg med, seier Boberg Andresen.

Siste video

Programleder: Mariann Reikerås
Onsdag 16. august begynte flyttingen av den store flytedokken fra Laksevåg til Ågotnes.