– Eg synst det er utruleg. Det er greitt at Hardanger har eit namn som destinasjon. Men me og har fjordar vassdrag og fjell som me vil ta vare på, seier ordførar i Masfjorden Karstein Totland frå Høgre.
Han meiner kommunane i Nordhordland vert behandla annleis enn kommunane i Hardanger. BKK skal bygga ei høgspentlinje mellom Modalen og Mongstad for å sikre eit meir stabilt straumnett.
Les òg: Skal det vera ei menneskemast?
Fekk 100 millionar
Etter kraftige protestar fekk kommunane i Hardanger 100 millionar i kompensasjon etter at Regjeringa ikkje gjekk med på å legga høgspenttraseen mellom Sima og Samnanger i sjøkabel.
Når Masfjorden kommune i Nordhordland ber om det same er avslaget kontant, skriv avisa Nordhordland.
Seniorrådgjevar i Olje- og energidepartementet Jon Evang seier til avisa at det er uaktuelt med kompensasjon. Departementet viser til at det er eit felles nasjonalt ansvar å sørgja for eit godt og stabilt straumnett.
Les òg: Aksjonistane gjev ikkje opp
5 mil med linje
Ifølgje ordføraren vert Masfjorden ein av dei kommunane i Hordaland med mest kraftlinjer, når lina står ferdig.
– Me vert råka kraftig. Me vil få om lag fem mil med samanhengande høgspenttrasé, seier Totland til NRK.no.
Sidan kravet om kompensasjon ikkje kjem på tale, forventar Høgre-ordføraren at krava om andre avbøtande tiltak vert akseptert.
– Om me ikkje får pengar ønskjer me i alle fall at delar av lina må gravast ned, seier ordføraren.
Les òg: Kraftlinjer i turlandskap
