I 12 år har John Inge Vik drive med villsau i Fitjarøyene, sør for Bergen. Dyra har det godt der dei går på heilårsbeite langs den verneverdige kystlyngheia.
Men idyllen vert brote av den totalfreda kongeørna som også har funne seg godt til rette i området.
– Ørna tek lamma, og sauene spring heilt febrilske rundt og lurer på kvar det er blitt av, seier Vik som dei siste to åra har han mista kring 30 prosent av lamma sine, høgst truleg til kongeørn.
I fjor drap den freda ørna så mange lam at Mattilsynet no vurderer å nekte villsaudrift på fleire av Fitjarøyane.
Seniorrådgjevar Trude Lien i Mattilsynet seier til NRK at det er heilt uakseptabelt med slike tap og at Vik kan verte nekta å ha villsau på øya.
– Konstant frykt og uro hjå desse dyra over tid går ikkje an. Det gjer at bøndene kan bli nekta å ha villsau på beite.
LES OGSÅ:
Fylkesmannen vil ikkje gje fellingsløyve
John Inge Vik har søkt om fellingsløyve på det hekkande kongeørn-paret som bur i området, sjølv om kongeørna er totalfreda i Noreg. Miljøvernsjef Kjell Kvingedal hos fylkesmannen har avslått søknaden.
– Me er redd for at viss ein skyt ei ørn, vil problemet bli det same når det kjem nye ørner for å ta over området.
– Skal me gje fellingsløyve må me vite heilt sikkert kva slags individ det er som gjer skade. Det har me ikkje nok kunnskap om no, seier Kvingedal.
John Inge Vik meiner ein kan sjå kva slags fuglar det er som drep lamma.
– Eg er ikkje interessert i å utrydde kongeørna, men det er no ein gong slik at ein må ta vekk dei dyra som gjer skade, seier han.
– Då eg fekk gå i reira til ørnene for å sjå var det snakk om minst fem lam i veka i reiret. Ei god byrjing på å løyse problemet vil vere å ta ut det hekkande paret, meiner han.
LES OGSÅ:
Kommunen meiner ørnene bør skytast
Sauene held vekke busk og kratt og er difor viktige for å bevare den opne kystlyngheia i Fitjarøyene.
Ordførar i Fitjar Wenche Tislevoll meiner omsynet til det spesielle landskapet må gå fyrst.
– Skal me kunne ta vare på kulturlandskapet, som er heilt spesielt, så er me avhengige av at sauer får beite der. Inneber det å skyte ørnene, så meiner eg det er det som må gjerast, seier Tislevoll.