Det er SV som har sett seg lei på at oppdrettsnæringa har skattefordelar som ikkje andre bransjar har. Det er bakgrunnen for at dei no foreslår ei ny lakseavgift.
– Oppdrettsnæringa har gått frå å vera ei lokal attåtnæring til å bli ein diger milliardindustri, med store eigarkonstruksjonar og multinasjonale selskap. Og dei lever nærast i eit skatteparadis i kommunane i Norge, meiner fylkesleiar Gina Barstad i Hordaland SV.
270 millionar til kommunane
Det var Klassekampen som først omtala avgiftsforslaget til partiet. Inspirert av Skottland vil SV at oppdrettsnæringa skal betala ein skatt på 25 øre per kilo produsert fisk, og pengane skal gå rett til kommunane som ekstrainntekt.
Finansdepartementet har rekna på kiloprisen til SV. Totalt vil skatten gi kommunane landet rundt totalt over 270 millionar kroner i årlege ekstrainntekter.
- Sjå oversikt over kommunane som får mest nedst i saka!
I Hordaland, eit av fylka der det kryr av oppdrettsanlegg, vil 40 av desse millionane hamna. Kvinnherad får mest med over fem millionar kroner i året, medan Austevoll og Bømlo kan dra i land over fire millionar kroner.
Lite begeistra
Men Austevoll-ordførar Morten Storebø (H) hoppar ikkje i stolen av den grunn.
– Alt som smakar av nye avgifter og skattar er eg skeptisk til, seier Høgre-ordføraren.
Det har lenge vore diskutert kva oppdrettskommunane i Norge skal få igjen frå næringa. Fleire forslag har vore på bordet. Storebø foreslår å føra tilbake delar av selskapsskatten.
– Det er ein skatt som blir dratt inn i dag, men den er statleg. Med ei tilbakeføring til kommunane, vil ikkje dette auka skattebyrda på bedriftene, argumenterer han.
Havbruksfond
Ein av oppdrettsgigantane, Marine Harvest, har lite til overs for SV sitt skatteforslag. Kommunikasjonsdirektør Ola Helge Hjetland syner til Havbruksfondet, som Stortinget vedtok å oppretta i 2015.
I fondet skal inntekter frå sal av nye konsesjonar til oppdrettsnæringa, betalast ut til kommunane som legg til rette.
– No er det slik at Havbruksfondet berre gir tilbake 70 prosent til vertskommunane. Vi skulle gjerne sett at heile summen gjekk tilbake, seier Hjetland.
Vil ha årleg inntekt
Men mange meiner Havbruksfondet ikkje fungerer slik intensjonen var. Fusa-ordførar Atle Kvåle (Ap) meiner fondet fordrar vekst i næringa. Han ynskjer seg heller meir føreseielegheit.
Med SV sitt forslag vil kommunen hans få 2,3 millionar kroner i året.
– Eg vil heller ha ei årleg avgift, framfor ei innretning som baserer seg på vekst. Det vil kanskje vil gi pene beløp i nokre år, men null i inntekter i andre år, seier Kvåle.
– Føreseielegheit både for næringa og kommunane må vera veldig viktig når ein skal avgjera slike skattar og avgifter.