Ettersom Gudvangatunnelen på E16 er stengt, er det større trafikk på omkøyringsvegane. I dag har det vore køar på riksveg 13 ved Hardangerbrua fordi det har oppstått tekniske problem i den nesten 8 kilometer lange Vallaviktunnelen.
– Vi har mista styringa over teknisk utstyr inne i tunnelen. Av omsynet til tryggleik er vi derfor nøydde til å begynne med kolonnekøyring og manuell dirigering inne i tunnelen, sa trafikkoperatør Kristian Fauskan til NRK i dag tidleg.
Klokka halv åtte har trafikken avtatt, men det er framleis kolonnekøyring og manuell dirigering på staden.
Usikkert
Det er for Vegvesenet usikkert kor lenge det blir slik. Elektrikarar jobbar på staden med å løyse problema.
Vegvesenet ba folk om å ta høgde for at det kan bli kø og ein del ventetid.
– Det blir følgjebil gjennom tunnelen. Er ein maks uheldig på å treffa den må ein venta i 15–20 minutt, seier Fauskan til NRK.
Køane strekte seg over Hardangerbrua og deretter gjennom den første tunnelen på sørsida av fjorden.
Foto: Petter Goga / NRKOmkøyring
Anbefalt omkøyring etter bussbrannen på E16 i Gudvangatunnelen er riksveg 7 over Hardangervidda eller E134 over Haukelifjell om ein skal frå aust til vest. Frå nord til sør blir E39 via Lavik-Oppedal anbefalt.
Riksveg 13 over Vikafjellet er anbefalt for personbilar og lokal trafikk.