Det er brannvesenet som melder på Twitter at dei har rykka ut til ei klatreulukke i Masfjorden i Hordaland.
– Ein klatrar skal ha falle ned seks meter. Ambulanse og brannkorps er på veg, seier operasjonsleiar Bjarte Rebnor i politiet.
NRK får opplyst av 110-sentralen Hordaland at personen er bevisst. Brannvesenet er på plass for å hjelpe helse med å frakte klatraren ned og i tryggleik.
Sendt med luftambulanse
Meldinga har kome inn til naudetatane klokka 19.54 i kveld.
Det skal vera eit klatrelag som er tre kilometer inn i Stordalen ved Matre. Klatringa skal ha gått føre seg på Kyrkjesteinen ved Matreelva.
Klatraren vart sendt til Haukeland sjukehus i luftambulanse.
Klokka 23.00 melder Helse Bergen at den 32 år gamle mannen er lagt inn på Haukeland med lettare skader.