I dag betalar restaurantar, kaféar og butikkar tusenvis av kroner kvar årleg i vederlag til TONO og GRAMO, musikarane og plateselskapa sine interesseorganisasjonar.
- Det er direkte frekt
Ei lovendring gjer altså at det frå nyår vert 50 prosent dyrare for næringsdrivande å spele musikk i lokala sine.
Butikksjef på Benetton i Bergen, Christine Sørensen, er ikkje særleg nøgd med betalingsordninga i det heile.
- Det er direkte frekt. Eg synes det er heilt håplaust at ein må betale for å få lov til å spele musikk i butikkene våre.
Sørensen reagerer på at musikkbransjen skal ha meir pengar for bruk av bakgrunnsmusikk. Sørensen har lita forståing for kravet - og har ingen planar om å betale meir.
- Då kuttar vi heller ut musikken, så enkelt er det. Eg har råd til det, men vi betalar nok som det er, seier Sørensen.
- Ikkje unaturleg å betale for musikken
Advokat Henriette Kristoff i Handels- og Servicenæringens Hovedorganisasjon er også kritisk til avgiftsauken.
- Vi tykkjer at dette er urimeleg og for dyrt. Det inneber at butikkane må sjå på totalkostnadane, og dei vil no truleg vurdere om dei skal slå av musikken i butikkane.
Direktør i Fond for utøvende kunstnere, Bjørg Eriksen, er derimot av ei anna oppfatning. Ho jublar for den nye avgifta, som vil tilføre fondet 10 millionar kroner i ekstra inntekter.
Eriksen meiner det er rett og rimeleg at handelsstanden betalar for musikkbruken.
- Når ein brukar musikken for å fremje eige sal og eiga næring, er det ikkje unaturleg at ein betalar for det, kommenter Eriksen.