- Me diskuterer om me skal oppretta ei svineinfluensa-legevakt. Men me har ikkje avgjort om me vil gjera det eller ikkje enno, seier overlege ved helsevernetaten i Bergen kommune, Arve Bang.
LES OGSÅ: |
Kva synest du? Er det naudsynt med ei eiga legevakt for influensasjuke? Sei di meining nedst i artikkelen!
Ikkje behov enno
Bergen kommune har dryge 200 fastlegar. Dersom prognosane i høve svineinfluensaen slår til, vil fastlegane få om lag 90 000 konsultasjonar kvar veke i dei såkalla toppvekene.
- Fordeler ein alle desse konsultasjonane ut i Bergen, er det snakk om fem eller seks henvendingar per fastlege i Bergen kvar dag. Det reknar me med at fastlegane klarer når dei er førebudde på det, seier Bang.
I så måte ser ikkje helsevernetaten noko behov for ei eiga legevakt for folk som har blitt råka av svineinfluensaen.
- I tillegg har dagens legevakter god kapasitet heile døgeret, presiserer Bang.
Omorganisering
- Dersom fastlegane får for mange henvendingar eller at folk til dømes blir svært redde og ringjer mykje, må me derimot oppretta ei eiga legevakt for svineinfluensa-spørsmål, seier overlege Bang.
Han fortel at det i eit slikt tilfelle kan bli aktuelt å gjera ei av legevaktene i ein av bydelane om til eit slikt midlertidig "svineinfluensa-senter".
- Det er ei smal sak å gjera ei av desse legevaktene om til eit slikt senter. Det einaste ein treng å gjera i så måte er å kalla inn personale, seier Bang.