Jubelen stod i taket på rådhuset i går då det blei det kjent at Bergen får sykkel-VM i 2017.
– Dette er fantastisk! Me skal lage det beste arrangementet me nokosinne har hatt, jubla byrådsleiar Ragnhild Stolt-Nielsen umiddelbart etter at nyheita kom.
For å gjere det har Bergen ei stor oppgåve framfor seg. Byen er enda ikkje noko eldorado for syklistar, og har fått kvass kritikk for mangelen på sykkelvegar, mellom anna frå by- og designplanleggaren Mikael Colville-Andersen.
– Det er deprimerande. Trafikkplanlegginga i byen er som å vera tilbake på 1950-talet, sa Andersen då han tidlegare i månaden besøkte Bergen.
– VM vil gjere det betre for vanlege folk
Bergen blei valt framfor søkarbyane Bogota (Colombia), Innsbruck (Austerrike) og Melbourne (Australia). Det er første gang sidan 1993 at VM vert arrangert i Norge.
Blant syklistane i Bergen var det i går ei forsiktig optimisme å spore.
– Det er veldig skummelt å sykle her. Ein kan jo alltids håpe at eit VM gjer det betre å sykle i byen, men eg tvilar på det, seier ein av syklistane NRK møtte ute langs vegen i går.
Men sykkelsjef i Bergen kommune, Einar Grieg, er sikker på at sykkel-VM er ein unik moglegheit til å legge til rette betre for vanlege syklistar i byen.
– Det er fleire store og små prosjekt på gang, som den vanlege syklisten kjem til å merke. Dette vil gjer det lettare for folk flest å sykle.
Han meiner åra fram mot sykkel VM i 2017 må brukast på å legge til rette langt betre for vanlege syklistar. Grieg trur sykkel-VM i 2017, også kan gi fortgang i planane om sykkelvegar for vanlege syklistar.
– Det blir meir fokus på det sportslege, men og på sykling for folk flest.
LES OGSÅ:
– Me må bruke denne anledninga
VM på sykkel reknast for å vere eit av verdas aller største idrettsarrangement. Det er venta at heile 330 millionar tv-sjåarar skal få oppleve ein idrettsfest i vestnorske omgjevnader i 2017.
Fylkesvaraordførar Mona Haugland Hellesnes trur som sykkelsjefen at sykkel-VM kan gje vind i segla for utbygginga av sykkelvegar.
– Me bør bruke denne anledninga me no har fått til å fokusere på kvardagssyklisten.
Byutviklingsbyråd Henning Warloe (H) var ikkje tilgjengeleg for ein kommentar i går.