Meldinga kom inn til politiet like før klokka 00.30 i natt. Ein mann med pistol tok seg inn på Esso-stasjonen i Kanalveien sør for Bergen sentrum, og kravde å få pengar med seg.
Ei kvinne som var aleine på jobb gav han eit mindre pengebeløp, før pistolranaren gjekk frå staden i retning Kanalveien.
– Ho varsla oss på telefon og fortalde at ein mann kom inn i butikken og truga med ein pistolliknande gjenstand, seier operasjonsleiar Lars Geitle til NRK.
Jaktar framleis
Politiet jaktar no etter den engelsktalande mannen som var iført svart hettegenser og er mellom 170 til 180 cm høg. Klokka 05.00 er han framleis ikkje funne.
– Han hadde dekka til ansiktet sitt og snakka engelsk under ranet. Overvakingsvideoen syner ranet så det blir eit viktig spor framover, seier Geitle.
Politiet utstyrte seg ifølge Bergensavisen med automatvåpen då dei rykka ut på meldinga.
Tilsett får skryt
Ifølge politiet var ranet over på eitt til to minutt og den tilsette på jobb får skryt for å ha ufarleggjort situasjonen.
– Det er ikkje mykje pengar han har fått med seg. Den tilsette har tatt det fint.
Bensinstasjonen har vore stengt sidan ranet. Politiet har sett inn fleire ressursar for å finna ranaren, mellom anna ein hundepatrulje.