Innbyggjarar i rasbygd fortvilar: – Det støkk i meg kvar gong eg ser ein ny stein

Dei 150 innbyggjarane i Åkra i Kvinnherad vart isolert frå omverda i ei veke etter at det gjekk eit stort steinras 28. juni.

Dette er ikkje første gongen Åkra er blitt isolert av ras. Det same skjedde 18 januar 2011. Då vart vegen rydda same dag.

– Det kjem steinsprang på strekninga kvar vinter. Det er ikkje kjekt å ha rasfaren hengjande over seg, seier Anne-Grethe Kjærstad Berge.

Ho pendlar kvar dag på fylkesveg 40, og har sjølv fått stein i bilen.

– Det støkk i meg kvar gong eg ser ein ny stein. No er det på tide at noko blir gjort, seier ho.

Krev tiltak mot ras

Fleire av innbyggjarane som NRK har prata med krev at vegen frå 1970 blir betre sikra.

– Vi er heilt avhengig av vegen. Det er den einaste vi har og då må den vera betre, seier Arild Kvame som er mjølkebonde.

Han og kollega Oddbjørn Sørheim gjekk tom for kraftfôr og fekk ikkje levering då bygda var isolert. Heldigvis hadde nokre naboar til overs.

Lars Emil Berge er redd få vil bu i Åkra når dei veit at vegen er så dårleg.

– Politikarane er i ferd med å laga klar den raude løparen for «Der ingen skulle tru at nokon kunne bu». Eg håpar dei heller gjer noko for å sikra vegen eller helst byggja tunnel, seier Berge.

Ingen konkrete planar

Hordaland fylkeskommune er vegeigar for fylkesveg 40. Dei har førebels ingen konkrete planar for å hindra rasfarlege reiser i framtida ved Åkra.

– Det er andre strekk på vegnettet vårt som er meir utsett for ras, seier fylkesdirektør for samferdsle, Håkon Rasmussen.

Rasmussen viser til at fylkeskommunen har investeringsprogram for fylkesvegnettet der rassikring ligg inne.

– Det er ei lista over faglege vurderingar og skredfaktoren avgjer plasseringa på lista, seier samferdsledirektøren.

Her er det seks ulike faktorar, der vegen si trafikkmengd og tal på skred vektar mest.

Lengre sør på fylkesvegen har Sundalstunnelen kome med i investeringsprogrammet med oppgraderingstiltak og isnett grunna høg fare for skred.

Vil løfta fram saka

Fungerande ordførar i Kvinnherad, Hans Inge Myrvold forstår frustrasjonen til innbyggjarane i Åkra.

– Det er eit rasutsett område og har ikkje ein akseptabel vegstandard. Fylkesvegen har ikkje blitt løfta godt nok fram til no, seier Myrvold.

Han seier til NRK at saka vil bli tatt opp ved første anledning i kommunestyret og med fylkeskommunen.

– Vi vil gå i gang med kartlegging. Fylkeskommunen må ta tryggleiksansvar her.

Myrvold vil foreslå fleire alternativ. Som betring av kaianlegg som eit strakstiltak, betre sikring av vegen eller ein tunnel.