I denne barnehagen er det tettpakka med pedagogar

I solsteika på taket av Solheimslien barnehage i Bergen vrimlar det av små hattar, solbriller og vassflasker. Til saman blir 75 barn passa på av 20 vaksne – halvparten av dei pedagogar.

Barnehagelærar Marie Berge har to barn på fanget. Ho trur det blir meir kvalitet i barnehagen med fleire pedagogar.

– Me har lært om kva barna treng. Som at me møter blikkontakt, sit oss ned med barna og viser at me lyttar. I tillegg snakkar me tilsette meir om fag når me er fleire, seier Berge.

– Veit for lite om betydninga

Som ein av fire barnehagar er Solheimslien barnehage ein del av eit forskingsprosjekt. Målet er å finna ut kva det faktisk betyr å ha mange utdanna barnehagelærarar blant dei tilsette.

– Når fleire fagfolk kjem inn, er det naturleg å tenka at ein kan læra meir. Men me veit for lite om kva det betyr å ha fleire pedagogar, seier Robert Ullmann, dagleg leiar i barnehagekjeda Kanvas.

Sidan 2011 har stiftinga, som står bak 64 barnehagar landet rundt, jobba for å få opp talet på pedagogar. I fjor inviterte stiftinga med Bergen kommune inn i prosjektet.

Prosjektet, som blir leia av Uni Research Rokkansenteret, skal finna svar på følgande problemstillingar:

• Kva skjer om halvparten av dei tilsette er barnehagelærarar?

• Kva kjenneteiknar kvaliteten i barnehagar der halvparten av dei tilsette er utdanna barnehagelærarar?

– Nyttar ikkje å berre fylla på med pedagogar

– Eg trur det vil skje store endringar i barnehagane. Kompetansen og spesialiseringa dei mange nyutdanna pedagogane vil ta med seg inn i yrket, vil truleg føra til ei profesjonalisering av yrket. På sikt kan det også heva yrkesstatusen, meiner statsvitar Anne Dåsvatn Homme, ein av forskarane bak pilotprosjektet.

Homme håpar at forskinga vil gi svar på korleis barnehagane best kan utnytta ressursane.

– Det har vore ein barnehagerevolusjon i Noreg dei siste ti-femten åra, men kvaliteten har kanskje vore nedprioritert. Det å forska og sjå kva faktorar som kan løfta tilbodet for barna våre, trur eg er lurt, seier barnehagebyråd i Bergen, Pål Hafstad Thorsen (Ap).

Først i 2019 vil forskarane legga fram sine funn.

Ingen pengar til barnehageløft

Allereie frå hausten av vil regjeringa innføra den nye bemannings- og pedagognorma, men dei har ikkje sett av pengar til kommunane.

• Les også: Schjelderup: – Heilt hårreisande at det ikkje er sett av pengar

Kanvas har rekna ut at 50 prosent pedagogtettleik og lik løn til alle barnehagelærarane vil kosta dei rundt 300 kroner per barn per månad.

Frå 1. august aukar kravet til pedagogdekning frå 33 til 43 prosent. Private barnehagers landsforbund meiner kravet allereie i 2021 bør vera over 50 prosent for å gjera barnehagane betre.

Men Kunnskapsdepartementet har ingen konkrete planar om å stramma ytterlegare inn.

– Med større tilgang på pedagogar og rekordhøg søking til barnehagelærarutdanninga ligg det til rette for at me får fleire pedagogar, skriv statssekretær Rikke Høistad Sjøberg (H) i ein e-post.