Ulovleg utsett amerikansk hummar er blitt eit problem i Noreg.
Mange av desse er bærarar av ein farleg sjukdom som er dødeleg for norsk hummar.
Berre i haust blei det funne fem amerikanske hummarar ved Bjorøy utanfor Bergen.
Skrekkscenario
- Skrekkscenarioet er at den amerikanske hummaren etablerer seg i vår fauna ja, seier havforskar Ann-Lisbeth Agnalt.
Tolv amerikanske hummarar er funne i norske farvatn dei siste åra.
I ein fersk rapport slår Ann-Lisbeth Agnalt og andre forskarar ved Havforskningsinstituttet alarm.
Importerer levande hummar
Hummarane blir importerte levande til Noreg, og blir sette ulovleg ut i sjøen.
Det kan bety døden for ein allereie svak norsk hummarbestand.
- Frykta er at desse hummarane skal vera bærarar av ein sjukdom som er hundre prosent dødeleg for europeisk hummar, fortel Agnalt.
Lite norsk hummar
Direktør ved Akvariet i Bergen, Kees Ekeli, kjenner til importerte skalldyr som har teke knekken på lokale bestandar tidlegare.
Han fryktar at det same kan skje med norsk hummar.
Hummarbestanden i Noreg har vore låg sidan 50-talet, og fangstreglane er strenge. Difor et me ofte importert amerikansk hummar.
Vil stogga importen
Kees Ekeli ber no styresmaktene om å stogga importen.
- Eg ser overhovudet ingen grunn til å importera eit levande dyr som kan øydeleggja den norske faunaen på denne måten, meiner han.
På Akvariet i Bergen kan publikum møta ein av dei 12 amerikanske hummarane som er funne i Noreg.
I haust blei det funne fem hummarar ved Bjorøy utanfor Bergen, og fleire av dei har lagt egg i norske fjordar.
Om larvene blir vaksne hummarar, kan norsk hummar vera i fare.