Høgskulen opnar for fusjon med UiB

– Styret vårt gjorde i går eit vedtak der me ynskjer å behalde vår profil som profesjons- og arbeidslivsretta institusjon, samtidig som me ynskjer å bli eit universitet, seier rektor ved Høgskulen i Bergen, Ole-Gunnar Søgnen.

Bakgrunnen for vedtaket er at Regjeringa har varsla ein stor strukturreform i universitets- og høgskolesektoren (SAKS).

Alle institusjonar i Noreg er bedt om å komme med sine innspel til ein framtidig struktur innan 1. november.

• LES OGSÅ: – Slå dere sammen

To mogelegheiter

Målet med strukturreforma i universitets- og høgskolesektoren er færre institusjonar, men ikkje nødvendigvis færre lærestader.

– Me har to likeverdige vegar framføre oss. Den første er at me fusjonerer med høgskular på Vestlandet, og den andre er fusjonen mellom Høgskolen i Bergen og Universitet i Bergen, seier Ole-Gunnar Søgnen.

Høgskulen i Sogn og Fjordane, Høgskulen i Stord og Haugesund, og Høgskulen i Volda er dei mest aktuelle å slå seg saman med.

• LES OGSÅ: Vil orientere seg mot nordvest

– For begge dei to alternative vegane er det viktig at vi beheld vår profesjonsprofil og at me kan bli eit profesjonsuniversitet, seier han.

– Årsaka til at me opnar for fusjon med Universitet i Bergen er at me gjennom den siste månaden har hatt ein svært positiv dialog, seier Søgnen.

Han seier ein fusjon med Universitet i Bergen også kan inkludere andre høgskular på Vestlandet.

Stortingsmeldinga blir vedtatt i 2015.