Det er Bergensavisen som skriv at Nest-Sotra trenar David Nielsen møtte Godset-leiinga i Drammen onsdag. Den tidlegare fotballproffen er høgaktuell for ein trenarjobb i Strømsgodset, som denne sesongen kjempar om gullet i eliteserien.
– Vi ser alltid på moglegheiter for å styrke oss frå år til år, og vi ser på David Nielsen i eit trenarteam ja, bekreftar sportssjef Jostein Flo i Strømsgodset til avisa.
Han framhevar Nielsen si evne til å motivere, men vil ikkje sei akkurat kva rolle dansken kan få i trenarteamet.
– Handla ikkje om jobb
David Nielsen har levert gode resultat som trenar for Nest-Sotra. Denne sesongen han klubben opp i 1. divisjon.
Nielsen har tidlegare spelt for både Brann og Strømsgodset. Sjølv seier han at turen til Drammen ikkje handla opp jobbtilbod.
– Eg var der berre for å sjå på trening og få idear om korleis eg kan utvikle Nest-Sotra, seier han til BA.
Vil bli topptrenar
Nielsen har kontrakt med Nest-Sotra som varar ut denne sesongen. Klubben ynskjer å ha han med vidare.
På spørsmål om kva han svara om tilbodet kjem, svarar 36-åringen at det er eit spørsmål han må vege opp mot familien.
– For å sei det sånn; eg ynskjer å bli topptrenar, uansett, avsluttar han.