Ap gjer eit brakval i skulevala i Hordaland. Resultatet på 32,5 prosent er historisk. Høgre landar på skarve 16,9 prosent i oppslutning.
Det er 20 år sidan sist Arbeidarpartiet vann skulevalet i Hordaland.
– Det er heilt fantastisk og viser at ungdommane i Bergen og Hordaland har trua på oss, seier fylkesleiar i AUF Hordaland, Mari Klokkerstuen Kjellesvik, som gir æra for resultatet til sine partifeller i AUF.
I Bergen har Arbeidarpartiet godt grep om heile 33,1 prosent av stemmene. Oppslutninga står i sterk kontrast til resultatet før stortingsvalet i 2013, då Ap låg på 18,8 prosent.
Høgre er i motvind i vestlandshovudstaden. Etter å ha hamna på 33,5 prosent i 2013, fell talet på stemmer dramatisk i år. Høgre endar på 18,7 prosent.
- LES OGSÅ:
– Eit brakval utan like
– Dette er tidenes skuleval for Arbeidarpartiet i Hordaland. Då vi vann for 20 år sidan hadde vi rundt 16 prosent av stemmene, så dette er på eit brakval utan like, seier ungdomskandidat i Arbeidarpartiet i Bergen, Linn Kristin Engø.
Ungdomskandidaten trur skulevalet er eit teikn på eit skifte i den politiske retninga i landet.
– Dei unge har sett politikken regjeringa fører og ønskjer andre og meir inkluderande løysingar. No håpar eg verkeleg at Arbeidarpartiet vil ta over byrådskontora etter kommune- og fylkestingsvalet neste veke, seier Engø.
Engø og hennar partifellar vil samlast til valvake i Bergen i kveld.
- LES OGSÅ:
– Vi skal kome sterkare tilbake
Før siste kommune- og fylkestingsval i 2011 fekk Høgre heile 27 prosent av stemmene i skulevalet i Hordaland. Trass i gode resultat både då og i 2013 er ikkje Bergen Høgre sin ungdomskandidat overraska over nedgangen.
– Høgre har ikkje lege like høgt på målingane som tidlegare, og vi gjer det alltid dårlegare i skulevala før kommune- og fylkestingsvala enn ved stortingsval, seier Hannah Atic.
Likevel er det ikkje til å legge skjul på at eit betre resultat hadde vore å føretrekke.
– Vi må lære av dette og er einige om at vi ikkje skal møte eit nederlag med å gi opp, men heller fokusere på å kome sterkare tilbake. Eg er imponert over våre valkampmedarbeiderar som framleis ute å står på stand for å vinne valet neste veke. Det er trass alt det som er det viktigaste, seier Atic.