På kafeen Tre brør på Voss styrer dei etter ein leiarstruktur uvant for mange, og meir demokratisk enn på dei fleste arbeidsplassar.
– Me stemmer på kven som skal vere leiaren i ein månad av gongen. Akkurat no er det Kristoffer. Viss me ikkje er fornøgde med å ha han som leiar, kan me stemme på ein ny ved neste val, fortel ein av dei tilsette, Lucie Sediva.
Migrapolis har undersøkt korleis kulturforskjellar på arbeidsplassar i Noreg skapar utfordringar for utlendingar i Noreg. På Tre brør fann dei ein flat struktur, som kan vere krevjande å tilpasse seg etter, for folk vande med ein hierarkisk organisert arbeidsplass.
På Vestlandsrevyen klokka 18.45 kan du sjå eit innslag frå Tre brør på Voss. Heile Migrapolis-reportasjen kan du sjå klokka 22.30 i kveld på NRK1.
– Meir effektivt med flat struktur
Eigar Bjørn Helge Bruborg innført leiarstrukturen på Tre Brør.
– Eg har stor tru på den flate strukturen. Det er ein veldig nordisk modell at ein ikkje har hierarki, og at ikkje andre bestemmer kva andre skal gjere. Eg trur det er veldig effektivt at den som skal utføre jobben, i stor grad tek avgjerslene, seier Bruborg.
Det kan vere vanskeleg for folk med andre kulturbakgrunnar å tilpasse seg ein slik arbeidsplass, seier han. Men Bruborg er overbevist over det er betre for bedrifta og dei tilsette at mange av avgjerslene ligg hos dei tilsette.
– Eg har ikkje noko ønske om å vere «boss»
Dei fleste tilsette på Tre brør på Voss er utlendingar. Slik er det også på Voss ølbryggeri som leverer øl til kafeen. Eigar Jeanette Lillås seier dei merkar godt at kulturen på arbeidsplassen skil seg frå kva ein del utlendingar er vande med.
– Me har hatt amerikanarar tilsett hos oss som er vande med at ein arbeidsplass er hierarkisk bygd opp. For dei er det vanleg at ein kanskje ikkje seier meininga si, men heller jattar litt med. Men eg har opplevd dei som veldig hardt arbeidande.
Noko uvant er det for Lillås å bli tiltalt som «boss».
– Det har eg vore litt ukomfortabel med. Eg har ikkje noko ønske om å vere «boss», ler ho. Eg vil heller jobbe saman.