Her kan elektriske ferjer kutta 66 avgangar i veka

Dieselferjer er ein miljøversting når det gjeld klimagassutslepp. Difor har politikarane i ferjefylket Hordaland lagt ein ambisiøs plan for å byta ut den aldrande ferjeflåten.

Målet er å satsa på elektriske ferjer eller hybridferjer på dei fleste strekningane i fylket.

• LES: Fekk klimapris for strenge miljøkrav

Legg opp til 66 færre avgangar

Skyss har laga ein alternativ rutetabell for ferjesambandet Jektevik-Nordhuglo-Hodnanes i anbodsgrunnlaget for miljøferjene. Her er det lagt opp til 66 færre avgangar i veka ved innfasing av ei heilektrisk batteriferje på sambandet.

– Det går ikkje an. Då blir det eventuelt flytting, seier Elin Anita Erstad.

Tysnesværingen dagpendlar til jobben i Fitjar kraftlag. I 13 år har ho pendla på sambandet mellom Tysnes til Stord.

– Eg brukar over ti timar kvar veke på å flytta meg mellom heim og arbeid. Viss det skal bli endå meir må eg jo ta nokre vurderingar i lag med familien for å finna ut kva eg vil gjera, seier Erstad.

– Tenkjer berre miljø, ikkje på distrikta

Fylkeskommunen har sett krav om utsleppskutt på minst 55 prosent for dei 17 ferjestrekningane i fylket.

Dei sju første blei i oktober i fjor tildelt selskapet Fjord 1. Snart blir det klart kven som tek over ferjesambandet Jektavik-Nordhuglo-Hodnanes.

Grunnen til nedjusteringa er at elektriske ferjer treng lenger liggetid ved kai for lading.

Fylkespolitikarane har tenkt for lite på konsekvensane av det, meiner Tysnes-ordførar Kåre Martin Kleppe (H).

– Eg har full forståing for ei miljøsatsinga. Men når dei ikkje legg inn krav om at rutetilbodet i kommunane skal halda fram, så har dei faktisk berre tenkt miljø og ikkje på det som er våre transportmoglegheiter i distrikta.

• LES: Hordaland får millionar til miljøvennlege ferjer

Kleppe meiner fylkestinget burde ha vedteke ein miljøpakke som set krav om at rutetilbodet skal halda fram som i dag.

– Då hadde ein pressa på for miljøvenlege løysingar, men samstundes ikkje opna for at transportmoglegheitene i distrikta blir dårlegare, seier Kleppe.

Fylkesvaraordføraren: – Ei skisse

Fylkesvaraordførar Pål Kårbø (KrF) lovar at rutetilbodet skal fungera viss det blir sett inn elektrisk ferje i sambandet.

– Eg oppfattar den alternative rutetabellen som «skisser». Me bør ikkje engsta oss for mykje ut frå innhaldet i desse. Skyss seier at dei ikkje kjenner seg att i den skildringa. Eg skal slåst saman med tysnesværingane og andre viss tilbodet vert for dårleg.

For Erstad er løysinga enkel: Dei miljøvenlege alternative må vika til dei er stabile nok til å følgja i dieselferjene sine bølgjer.

– Dei må ikkje setja inn ferje med ny teknologi før teknologien er god nok til at me kan ha den same frekvensen på ferjeavgangane i dag, meiner ho.