Tidlegare denne veka kunne vitne først sjå røyk sive ut frå ein mur i eit bustadområde i Bergen, etterfølgt av eit høgt smell.
Det viste seg å vere ein jordkabel som eksploderte. Jordkablar har ei spenning på inntil 400 volt.
Ifølgje BKK eksploderte kabelen fordi den fekk kontakt med oksygen. Det hadde oppstått ein slitasje på kabelen i punktet mellom asfalten og steinmuren.
– Det er lite truleg at dette kunne medføre fare for omgjevnadene, men røyk og gnistrar som finn vegen opp frå bakken er godt synleg, seier Ole Johan Hatlen, ingeniør i BKK Nett.
Hatlen presiserer at dersom ein mistenker feil på elektriske anlegg heime eller utandørs, så bør ein halde avstand og melde frå til straumselskapet så fort som mogleg.
Brannvesenet: – Kan potensielt vere dødeleg
Varabrannsjef i Bergen brannvesen, som også har sett videoen, seier at ein aldri må røre slike kablar.
– Det er farleg fordi den beskyttande isolasjonen rundt kabelen er svekka, seier Frode Bødtker.
– Kor gale kunne dette gått?
– Dette er svært vanskeleg å svare på. Potensielt kan dette vere dødeleg ved feil tilnærming. Den største faren her er nok berøringsfaren og eventuelt brannsmitte om kabelen ligg i nærleiken av noko brennbart, seier Bødtker.
VARSAM: – Når brannvesenet får melding om slike hendingar, gjer vi aldri noko før vi har konferert med BKK, seier Frode Bødtker i Bergen brannvesen.
Foto: Simen Sundfjord Otterlei / NRKTruleg frå slutten av 1960-talet
Jordkabelen som eksploderte er ifølgje BKK truleg frå slutten av 1960-talet.
– Kablar som får ligge i ro utan fysisk påverknad kan ha lang levetid. Nokre høgspentkablar som framleis er i drift er godt over 70 år gamle, seier Hatlen.
Det skjer kring 100 feil i året på jordkablar i BKK sitt straumnett.
– I det kortslutninga skjer oppstår det eit smell med etterfølgjande flamme. Sikringane ryk, og kabelen blir spenningslaus inntil den er reparert, forklarar Hatlen.
100 FEIL I ÅRET: Ifølgje ingeniør i BKK, Ole Johan Hatlen, skjer det kring 100 feil på jordkablar i deira straumnett i løpet av eit år.
Foto: BKKUlike årsaker
Det er ulike årsaker til at slike feil skjer. Bevegelsar i bakken kan føre til at kabelen blir strekt meir enn den toler. Slike jordkablar er nemleg lite fleksible.
– Arbeid i nærleiken av kabelen kan påverke. Til dømes å slå ned gjerdestolpar for autovern, slik at stolpane treff kabelen under bakken. Alder på kabelen i kombinasjon med auka straumforbruk og at kabelen har nådd si tekniske levetid kan også vere årsaker, seier Hatlen.
