Heldt budsjettsprekk på fire milliardar hemmeleg

– Det er heilt utilgjeveleg. Eg har aldri opplevd maken, seier Kjersti Toppe (Sp).

Ho meiner regjeringa har spelt eit ureint politisk spel i fornyinga av den rasfarlege og ulukkesbelasta hovudvegen E16 mellom Arna i Bergen og Stanghelle i Vaksdal.

I sju månadar heldt regjeringa hemmeleg eit brev om at vegen ville bli fire milliardar kroner dyrare hemmeleg.

Opposisjonspartia og Norges Miljøvernforbund meiner statsministeren og samferdsleministeren har villeia og lurt Stortinget om milliardsprekken.

– Svindel

Norges Miljøvernforbund har gått gjennom brev og referat i denne saka, og meiner regjeringa har manipulert Stortinget.

– Dette er det største svindelforsøket i veghistoria på Vestlandet, og det er heilt uakseptabelt, seier Kurt Oddekalv i Norges Miljøvernforbund.

• Les òg: Ny kostnadssprekk for Hordfast - 43 milliarder kroner

Den 3. oktober kjem det eit brev frå Statens vegvesen til Samferdsledepartementet. Vegvesenet fortel at dei har rekna 4 milliardar kroner feil på anleggskostnad og bompengepotensialet for ny E16.

Solvik-Olsen: – Ein liten feil

Brevet blei ikkje registrert i postlista, og samferdsleminister Ketil Solvik-Olsen nemnde ikkje milliardsprekken overfor Stortinget.

– Det blei aldri frå vår side halde tilbake fakta eller informasjon i denne saka. Me beklagar journalføringsglippen som skjedde, men det var ikkje eit forsøk på å halda noko hemmeleg.

• Erna med pengedryss til Bergensbanen, E16 og E39
• Stor folkeaksjon for ny E16 mellom Bergen og Voss

– Her har det vore mykje uryddigheit undervegs, og det er trist, for E16 er eit utruleg viktig prosjekt, seier Ruth Grung i Ap.

Solvik-Olsen seier Stortinget ikkje hadde behov for å få vita om milliardsprekken.

– Det hadde vore ein ganske stor informasjonsstraum viss Stortinget skulle fått informasjon kvar gong det blir gjort nye reknestykke. Det viktige for Stortinget er at dei er informert om prosjektet når dei skal handtera saka.

Tilfeldig at det kom opp i Stortinget

I ein debatt på Stortinget 7. mars kjem det plutseleg fram at prisen på ny E16 Arna-Stanghelle har auka med fire milliardar.

I løpet av mars blir både samferdsleministeren og statsministeren i Stortinget spurt om dokumentasjon om milliardsprekken på E16.

Verken Solvik-Olsen eller Solberg nemner brevet dei fekk 3. oktober. Ikkje ein gong då regjeringa 5. april legg fram sitt fullstendige forslag til Nasjonal Transportplan.

• Les òg: Ap krever at E16-utbyggingen starter i 2021

Først då Bergens Tidende fekk tak i brevet og omtala det 18. april, blei innhaldet kjend for Stortinget og offentlegheita.

– Eg har aldri opplevd i ei sak på Stortinget at slik informasjon kjem fram heilt tilfeldig, og at det berre er nokre på Stortinget som veit om det, altså regjeringspartia sjølv, seier Kjersti Toppe.

– Stortinget har ikkje sete og gjort avgjerder på feil grunnlag. Motiv som opposisjonen her skuldar oss for om forsøk på å skjula informasjon – slike ting skjer ikkje, seier Solvik-Olsen.