Havforskarar for ein dag

Sjølv om Noreg er ein kystnasjon, lærer elevane lite om havet og sjøen på skulen.

Dette meiner forskar ved Havforskningsinstituttet, Jan Erik Stiansen, er for dårleg.

- Viss du ser i lærebøkene, så står det skremmande lite om det marine livet. Det er veldig synd. Fiskeria og havressursane er jo nokre av dei største eksportressursane me har, seier han.

Pilotprosjekt

For å gje unge meir kunnskap, har Havforskningsinstituttet dratt i gang eit pilotprosjekt i samarbeid med lærarutdanningane i Bergen.

Torsdag fekk elevane ved Sandgotna skule i Loddefjord prøva seg som forskarar i fjæra.

- Det er kjekt. Det er det kjekkast me har gjort i år, seier Eivind Dullum Bjørnestad.

Lærar Henriete Hauge meiner også tilbodet er bra.

- Dette er nærområdet deira, så då er det viktig at dei får kunnskapar om korleis dei kan bruka det, og kva dei kan bruka fjæra til, seier Hauge.

Vil bli fiskar

Så langt er det berre eit prøveprosjekt, men Havforskningsinstituttet ynskjer å byggja opp eit tilbod som alle skulane i landet kan dra nytte av.

Nokre er alt overbeviste om at framtida ligg her ute.

- Det er kjekt å leite etter det som ligg i havet. Ein veit jo aldri kva ein finn. Det er eigentleg det her eg har drøymt om å jobba med. Eg vil bli fiskar, seier Eivind Dullum Bjørnestad.