Hald på badetrusa – sommarvarmen held fram

26,7 grader er det nest varmaste som er målt på målestasjonen på Florida sidan 1904.

Den einaste septemberdagen som har vore varmare var for ti år sidan. 14. september 2006 målte meteorologane 27,1 grader.

Slike tal fordrar til soling og bading.

– Det var kaldt i alle fall. Eg kjende pulsen gjekk opp, seier William Vik etter å ha kasta seg uti.

Solslikkarane i Bergen var ikkje åleine om å nyta den seine sommarvarmen.

Rekord i innlandet

Bergen har vore varmast i Hordaland i dag, og på Kvamskogen vart det sete ny septemberrekord.

Ikkje sidan målingane starta i 1957 har det vore målt varmare i utfartsområdet mellom Bergen og Hardanger. 24,8 vart fasiten.

• Les også:

– Det er ingen tvil om at dette er uvanleg. Det hender at det er varmt i september, men no har me vore heldige med varmen som kjem frå sør, seier vakthavande meteorolog ved Vêrvarslinga på Vestlandet, Arnstein Tjøstheim.

Varmen er truleg forbigåande. Sjølv om finvêret held seg, skal det verta kjøligare dei neste dagane. Prognosane for neste veke er enno usikre, men veka startar bra, varslar meteorologen, med stort sett pent vêr. Temperaturen vil liggja rundt femten grader.

– Folk får koma seg ut

Men morgondagen ser lovande ut.

– Første del av dagen kjem temperaturen eit stykke over 20-talet. Det vert høge temperaturar, men ikkje fullt så høge som i dag. Men det er likevel langt varmare enn normalen for september, så folk får koma seg ut, oppmodar Tjøstheim.

Utover ettermiddagen og kvelden er det meldt bygevêr. Meldingane for neste veke er enno usikre, men veka startar bra.

• Les også: Kan bli 10 grader kaldere

Og sjølv om temperaturane vil liggja rundt 15 grader, har meteorologen nokre trøystande ord.

– Det er framleis litt varmare enn normalt for september.