Godt liv etter hjartestans

Hopp til innhold

– Når ein har fått smake litt på døden, set ein også pris på det ein har i livet trur eg, seier anestesilege Bård Heradstveit.

Han har leia eit forskingsprosjekt der Haukeland sjukehus har følgt 19 personar som har hatt hjertestans over fleire år.

– Ser lysare på livet

– Det vi fann er at dei aller fleste som overlever fortel at dei har eit godt liv, i betydning av at dei fungerer godt i kvardagen, seier Heradstveit.

Trass i at hjartestans kan føre til svært alvorlege skader melder dei mange om eit godt liv. Ikkje berre var dei fleste i stand til å gå tilbake til arbeidet sitt etter hjertestansen, dei fekk også eit lysare syn på livet.

– Dei vi følgde rapporterte overraskande nok at dei hadde meir lyst på livet enn den generelle norske befolkninga hadde, fortel Heradstveit.

– Kom som eit slag

Ein av dei 19 personane som Haukeland universitetssjukehus har følgt er 72 år gamle Arne Bryøen.

Den 13. mai 2006 var Bryøen rett utanfor huset sitt i Fyllingsdalen i Bergen. Førebuingane til nasjonaldagen var i gong, men denne vårdagen blei ikkje slik som han hadde tenkt.

– Eg fekk plutseleg hjartestans. Det kom heilt plutseleg. Det kom som lyn frå klar himmel. Så var eg vekk, fortel Bryøen.

Nasjonaldagen måtte feirast i sjukesenga på Haukeland universitetssjukehus.

Fullverdig liv

I dag lever 72-åringen eit fullverdig liv. Han meiner at hjertestansen ikkje har lagt band på korleis han lever livet sitt.

– Nei, absolutt ikkje. Eg røykjer framleis og et den maten eg likar. Livet set eg stor pris på. Eg har også fått barneborn og har fleire i emning, så eg håpar på fleire gode år framover, seier

Nokre forandringar har han likevel gjort etter hjertestansen. Å gå tur med hunden Laika er blitt ein vane og Arne er meir oppteken av å halde seg i form.

– Vi har veldig fint turterreng rett rundt hjørnet her, så det er ikkje så vanskeleg, fortel Arne.