– Historia har vist oss at me aldri skal vera naive, seier olje- og energiminister Ola Borten Moe, som ikkje avviser at væpna vakthald kan verta framtida ved norske olje- og gassanlegg.
Etter gisselaksjonen mot Statoil sitt anlegg i In Amenas i Algerie har Regjeringa sett i gang ein full gjennomgang av tryggleiken ved olje- og gassanlegga her til lands.
Beskytta av gjerder
Onsdag fortalde Bergens Tidende om skilnadane i tryggingsnivået mellom norske og britiske gassanlegg. Medan anlegg i Storbritannia vert patruljert av væpna vakter, møter to gjerder dei som nærmar seg anlegget på Kollsnes i Øygarden i Hordaland.
Først eit lågt gjerde med eit «adgang forbudt»-skilt, deretter eit tre meter høgt piggtrådgjerde. Det er det som hindrar uvedkommande frå å komma heilt fram til Statoil-anlegget.
Unorsk, men ikkje utenkeleg
Statsråden frå Senterpartiet avviser ikkje at væpna vakthald kan verta framtida også i Noreg. Sjølv om han meiner det vil bryta med norsk tradisjon.
– Det vil vera ei annleis tilnærming enn det me har hatt til no, men det betyr ikkje at me ikkje skal gå gjennom dette på ein grundig måte, seier Borten Moe til NRK.no.
STOR SKILNAD: Olje- og energiministeren varslar ein grundig gjennomgang av tryggleiken ved norske olje- og gassanlegg.
Foto: Grafikk / NRKEinaste løysinga
Så lenge politiet og Forsvaret ikkje kan lova kortare utrykkingstid enn i dag, ser ikkje beredskapsrådgjevar Trond Ingebrigtsen noko anna løysing enn væpna vakthald.
EINASTE LØYSINGA: Beredskapsrådgjevar Trond Ingebrigtsen meiner væpna vakthald innførast ved norske olje- og gassanlegg.
– Det handlar om at politiet ikkje alltid kan vera på plass til ei kvar tid, då vil alternativet vera ei permanent væpna eining som kan sikra tryggleiken ved desse anlegga, seier Ingebrigtsen til NRK.no.
Han vurderer anlegga langs norskekysten som svært sårbare.
– Mykje av produksjonen offshore endar samla sett opp ved desse anlegga. Det seier seg sjølv at dette er ein sårbar infrastruktur.
VIDEO: Medan væpna vakter patruljerer gassanlegget i St. Fergus i Skottland, er det gjerder det einaste fysiske tiltaket på Kollsnes.
Lovar grundig gjennomgang
Ola Morten Moe kan i dag ikkje svara på korleis norske landanlegg og offshoreinstallasjonar skal sikrast i framtida.
Men han lovar ein grundig gjennomgang av tryggingsrutinene.
– Me går gjennom denne situasjonen, oppdaterer tryggleiksvurderingane våre, vurderer ulike tiltak for å til ei kvar tid ha ei skikkeleg sikring av anlegga våre, seier olje- og energiministeren.
