Familien krev erstatning frå Vegvesenet

Det var natt til 28. februar i år at ein 47 år gamal nederlandsk mann køyrde utfor brua på E39 med vogntoget sitt. I førarhuset låg dottera (10) og sov.

• LES OGSÅ: Far og datter (10) omkom i utforkjøring på Stord

Begge mista livet i den tragiske ulukka. Store delar av vogntoget vart knust i utforkøyringa og køyretøyet vart liggjande delvis velta like ved ei elv.

No fremjar dei etterlatne etter dødsulukka erstatningskrav mot Vegvesenet.

– Det var ekstreme forhold på staden. Familien har ei oppfatning om at vegvesenet ikkje har gjort det dei kunne for å halde forsvarlege forhold og varsle trafikantar slik at ein kunne vere merksame på det på førehand, seier advokat Stig Nilsen ved Drageset og Preto i Bergen.

Hadde ikkje bilbelte

E39 har ei slak kurve på ulukkestaden, og det var særs glatt på vegen då ulukka skjedde. Berre timar før vogntoget køyrde utfor varsla ein politipatrulje om dei vanskelege forholda på staden. Vogntoget heldt ikkje høg fart, men det vart stadfesta at føraren ikkje hadde bilbelte på seg.

– Hastigheita har ikkje vore høg. Hadde dei hatt belte på seg, så hadde dei truleg blitt forslått og gjerne fått nokre skader, men det hadde ikkje blitt eit så alvorleg utfall som dette, sa overingeniør Andreas Eikeskog i Vegvesenet etter ulukka.

• LES OGSÅ: – Hadde overlevd med bilbelte

Livsfarleg vegstrekning

Dødsulukka i februar er ei av mange alvorlege ulukker på vegstrekninga. Ifølgje Bergens Tidende er E39 over Stord ei av dei verste ulukkesstrekningane på Vestlandet.

• LES OGSÅ: Døde på livsfarlig strekning
  

– Det er opplyst at det har vore veldig mange ulukker på den aktuelle staden. Vi ventar på ei oversikt frå Statens vegvesen over ulukkene og kva forhold det var på staden når dei ulukkene var ute, seier advokat Nilsen.

Det går etter forhold bra med familien til dei to som omkom i ulukka, men dei har slite økonomisk i tida etter. Advokaten hjelp dei også med å få erstatning frå eit forsikringsselskap i Nederland.