Varaordførar Tor Woldseth og finansbyråd Eiler Macody Lund frå Frp gjekk hardt ut i BT og garanterte at Frp ville stemme mot ei bybane over Bryggen i bystyret etter valet i haust.
– Vi er veldig klare på at vi ikkje vil ha bybane over Bryggen. Derfor vil vi samla stemme mot dette i bystyret, dersom vi ikkje kjem til semje i byrådsforhandlingane om at Bybanen skal gå i tunnel, seier finansbyråd Eiler Macody Lund (Frp) til Bergens Tidende i dag.
Vakte reaksjonar
Utspelet fekk Venstre sin førstekandidat Erlend Horn til å reagere. Dette fordi Høgre, Frp og Venstre i mai inngjekk ein intensjonsavtale om eventuelt byrådssamarbeid etter valet i haust.
På få timar gjer Frp heilomvending. Dei meiner framstillinga i Bergens Tidende i dag er feil.
– Frp har ikkje stilt noko ultimatum i saka om Åsane-banen, hevdar partiet i ei pressemelding i dag.
No vil dei forhandle likevel
– Vi går inn i ein byrådsforhandling med mål om å bli samde. Dei nye bystyregruppene må ta stilling til forhandlingsresultatet. Dersom Frp går inn i byråd etter valet, vil vi stå samla bak ein byrådsplattform også i bystyret, seier Eiler Macody Lund.
Utspelet frå Woldseth og Macody Lund kom i kjølvatnet av eit oppslag i Bergens Tidende fredag, der både Ap og Høgre seier at ei bybane over Bryggen vil bli eit forhandlingsspørsmål etter kommunevalet.
– Kva slags vinglepolitikk er dette, sa Woldseth om utspelet til BT i dag.
No vil altså Framstegspartiet likevel forhandle om trasespørsmålet.
– Vi er tydelege
– Vi stiller ikkje ultimatum. Vi er sterk tilhengar av at bybanen skal gå bak Bryggen, og vil gå i forhandlingar om det, presiserer Macody Lund ovanfor NRK.
Erlend Horn i Venstre seier han reagerte sterkt på oppslaget i BT i dag, men at han no har vore i eit oppklarande møte med Frp.
– Der fekk eg forsikringane eg trengde frå partiet, om at dei ikkje stiller ultimatum. Det er eg glad for.
– Korleis stiller du deg til at Frp då seier noko anna til BT?
– Det får vera ei sak mellom dei og avisa, svarar Horn.
– Korleis pregar ei slik sak forholdet mellom partia på borgarleg sida?
– Vi skulle klart vore ei slik sak forutan, men eg har fått forsikringane eg treng.
