– Eg tenkjer på kor mykje arbeid gutane mine har lagt i huset

Seint i ettermiddag kom det framleis røyk frå brannruinane på Djønno i Ullensvang. Brannen er den andre i den vesle bygda på to og eit halvt år.

Då brannvesenet kom til staden stod tre naust og ein så å seie ferdigstilt einebustad i full fyr.

Oddbjørn Djønne vakna av knitringa frå brannen og fekk varsla naboane.

– Eg konsentrerte meg om å få vekke dei som bur i nabohuset, slik at dei kunne komme seg ut.

Å sjå ein stor brann på nært hald var ein fæl oppleving.

– Då eg køyrde nedover vegen i natt var eg så shaky at eg sleit med å få tastelåsen av telefonen, seier Djønne.

Hadde bygd nytt hus til mora

Kva som kan vere årsaka til brannen, vil ikkje Oddbjørn Djønne tenkje på.

– Å tenke på kva som kan vere årsaka til dette er berre å øydeleggje seg sjølv. Me får berre håpe at politiet finn ut av det.

Dei var i gong med å bygge eit nytt kårhus til på mora på 91 år. Men natt til onsdag brann huset ned til grunne. Mora til Oddbjørn, Lilly Djønne, har vondt for å forstå kva som har skjedd.

– Eg har det tungt. Eg tenker på kor mykje arbeid gutane mine har lagt i dette.

Men huset skal reisast att, lovar sonen.

– Så snart me får lov av politiet byrjar me å bygge på huset att.