I juni blei ein 25 år gammal mann i Bergen tingrett dømd til elleve års fengsel for drap på bror sin, i Åsane i september i fjor.
Mannen anka dommen, og juryen frikjente så 25-åringen for drap, og dømte han i staden for lekamsskading med døden til følgje. No har fagdommarane forkasta frikjenninga, skriv BT.no.
LES OGSÅ:
Forkasta juryen si avgjersle
25-åringens forsvarsadvokat John Christian Elden reagerer sterkt. Han har vanskeleg for å forstå kvifor fagdommarane forkasta frikjenninga.
– Juryen følgde instruksjonane som lagmannsretten gav. Lagmannen sa tydeleg at juryen hadde to val: lekamsskading eller drap. Så tek juryen sitt val, i tråd med instruksjonen. Då er det underleg at fagdommarane setter rettsavgjerda til side. Det er underleg i ein situasjon der ein lèt som at det er folket ved juryen som skal ta avgjersla, seier Elden til BT.
Saka går no til ny behandling i lagmannsretten. Denne gongen vil retten bli sett utan jury, med tre fagdommarar og fire lekdommarar.
LES OGSÅ:
Døydde av blødingar frå knivstikk
Det var 21. september i fjor at 25-åringen gjekk til åtak på sin to år eldre bror med kniv i ein bustad i Liakroken i Åsane i Bergen. Bakgrunnen for krangelen skal ha vore ein konflikt mellom dei to brørne.
Den avdøde 27-åringen døydde av blødingar frå knivstikk i hjartet. Påtalemakta meinte 25-åringen stakk med vilje, og aktor Jan-Inge Wensell Raanes bad om elleve års fengsel i sin sluttprosedyre då saka gjekk i retten i slutten av mai.
I retten forklarte 25-åringen at han aldri hadde til hensikt å ta livet av bror sin under krangelen.