Nokon gav alt dei hadde, andre jogga, medan nokon gjekk hand i hand. Knarvikmila vart òg i år ein dundrande suksess.
Etter at ungdomsløp, minimil, halvmaraton, naturløypa og dei tradisjonelle løpa over 5 og 10 kilometer var gjennomført hadde over 7300 løyst startkontigent.
- Det er klart at dette er kjekt, me hadde nokon år det stagnerte på 5 og 10 kilometeren, men no har me stigning igjen og det lovar veldig godt, seier primus motor for Knarvikmila, Helge Brekke.
Knarvikmila-generalen har vore med sidan starten og kunne konkludera med at den 28. utgåva av mosjonsfesten vart ein av dei mest vellukka.
- Me som bur i Knarvik og i distriktet, Seim og Alversund, kan vera stolte over at me har fått til dette. Utan alle dei frivillige som stiller opp hadde ikkje dette vore mogeleg, seier Brekke.
(Meir under biletet)
- Flaggskipet vårt
Når Knarvikbygda inviterer til den årlege milfesten må alle vera med. Til og med ordførar Astrid Aarhus Byrknes var ein av dei mange som bidrog med frivillig arbeid.
- Det betyr utruleg mykje. Dette er jo på mange måte flaggskipet vårt i Lindås kommune og dei som jobbar med dette er så dyktige seier Krf-ordføraren i Lindås.
- Fantastisk arrangement
Medan etiopiske Girma Assefa gjekk sigrande ut av mennene sin 10 kilometer, var det ikkje overraskande Kirsten Melkevik Otterbu som sprang raskast av damene.
BFG-Fana-løparen har ikkje sprunge 10 kilometer på asfalt på to år, men Knarvikmila må ho ha med seg.
- Knarvikmila er jo eit av dei største arrangementa i Norge no, Organiseringa og alt er ekstremt bra. Dei frivillige gjer ein strålande jobb, seier Melkevik Otterbu.