NRK Hordaland er på plass med tv-team i Bergen som sender direkte i den tradisjonsrike "Gratulerer med dagen!"-sendinga på NRK1 i dag.
Reporter Mariann Reikerås og fotograf Alrik Velsvik skal ta oss med rundt omkring i Bergen og visa livet i sentrum på nasjonaldagen.
– Eg håpar alle er med på å feira dagen og skapa god stemning, som vi kan formidla vidare til tv-tittarane, seier Reikerås.
Heile fylket
NRK Hordaland skal i år filma frå Bergen, men ønskjer likevel at alle i heile Hordaland skal vera med å bidra med 17. mai stemning frå der dei feirar.
– Vi skulle gjerne vore i heile Hordaland, men det kan vi ikkje. Likevel ønskjer vi at folk er med å bidra med bilete og video så vi kan sjå korleis det er rundt omkring i heile fylket. Det er jo viktig at vi får visa fram det vakre fylket vårt på nasjonalt fjernsyn på denne dagen.
– Så no er vi klar for eit Hordalandskupp?
– Ja, det er i alle fall min plan. Så eg håpar no at alle sender inn bilete på Instagram med emneknagg #nrk17mai og/eller #nrkhordaland. Her er det berre å starta så tidleg som mogeleg å leggja inn bilete, seier Reikerås.
Ønskjer vinke-video
I år er det ikkje berre bilete som vert ønskja, men og små vinke-videoar.
– No skal folket og ikkje berre kongen få vinka til Noreg. Så send inn ein liten snutt der dykk vinkar, oppmodar Reikerås.
Du kan senda inn dine bilete ved å merka dei med #nrk17mai og/eller #NRK Hordaland på sosiale medium. Slår du på stadsopplysning på telefonen din i tillegg, så kjem biletet med på kartet vårt. Har du ikkje tilgang, så kan du og senda ein mail til hordaland@nrk.no.
Sendinga byrjar klokka 07.50 og varer til klokka 16.00.
