Åtte personar var involverte i ulukka. Dei første meldingane gjekk på at sju var skadde, og at to av desse hadde kritiske skader. Politiet fekk melding om ulukka litt sør for Stanghelle på E16 i Vaksdal kommune klokka 17.02.
Totalt vart sju personar sende til Haukeland sjukehus med alvorlege skader. Dei skadde, seks kvinner og ein mann, er i ein alder mellom 22 og 39 år. Tre personar sat i ein norsk bil, medan fem sat i ein tsjekkisk bil.
SISTE: Helse Bergen melder seinare fredag kveld at fire av dei som vart send til Haukeland sjukehus har alvorlege skader, medan to har lettare skader. Ein person ligg på Voss sjukehus med lettare skader
Klokka 19.25 melder Statens vegvesen at vegen er opna igjen.
Måtte skjerast ut
Bileta syner at begge dei to bilane er totalskadde etter kollisjonen. Overbetjent ved Voss lensmannskontor, Edvin Kallestad, seier at dei ser verre ut fordi brannvesenet måtte rive laus delar av køyretøya for å få personane ut.
– Det er heilt normal prosedyre ved ulukker der folk er skadde. Det er for å få dei ut på ein rask og sikker måte, seier han.
(Saka held fram under biletet)
LANGE KØAR: Det er meld om lange køar grunna ulukka. Dette biletet er teke ved Vaksdal.
Foto: Åge Algerøy / NRKAvhøyrer vitne
Årsaka til ulukka er førebels ukjend.
– Eg kan ikkje uttale meg om det før vi har snakka med vitne. Vi har ikkje teke stilling til om vi skal gjere tekniske undersøkingar på ulukkesstaden, seier Kallestad.
Politiet kom raskt til staden.
– Vi hadde ein patrulje under transportoppdrag og kom difor raskt på staden. Patruljen varsla sju skadde, seier operasjonsleiar Preben Wallestad til NRK klokka 17.25.
Det var først ukjend kor mange som var i dei to personbilane.
– No har vi fokus på livreddande arbeid, sa Wallestad like etter at politiet var komne til staden.
Ulukka førte til lange køar på staden før vegen vart opna klokka 19.25.