Kollisjonen skjedde kl. 16.04.
– Ein førarlaus bil trilla ut i sporet og blei påkøyrt av Bybanen. Fleire passasjerar på Bybanen skal ha blitt skadde, seier operasjonsleiar Ronny Jarle Lentføhr i Hordaland politidistrikt.
Det skal i hovudsak vera snakk om kuttskadar. Tre personar er sendte til legevakt i ambulanse, og ein person blir sendt til Haukeland universitetssjukehus.
Passasjeren som blei sendt til Haukeland universitetssjukehus er ein 34 år gammal mann og han er lettare skadd, opplyser Helse Bergen i ei pressemelding.
Veit ikkje kvifor bilen rulla
– Me har fått kontakt med eigaren av bilen. Kvifor den rulla ut i bybanesporet veit eg ikkje, men me opprettar sak og det vil bli etterforska vidare, seier Lentføhr.
Bilen blir taua til Biltilsynet, der det skal gjennomførast teknisk kontroll.
Det oppstod store trafikale problem på staden etter kollisjonen, men i 17-tida var bybanevogna fjerna og både bybanetrafikk og anna trafikk går som normalt igjen.
Bybanen som krasja med bilen var på veg sørover mot Nesttun og kollisjonen skjedde mellom stoppet på Danmarksplass og stoppet på Kronstad.