Det var Hovudredningssentralen som meldte at MF «Fedjefjord» grunnstøytte like utanfor kaia på Sævrøy i Nordhordland i føremiddag.
Ifølge BT, som først melde om grunnstøytinga, fekk alle passasjerar om bord på seg redningsvest.
Ferja var på veg frå Sævrøy til Fedje, då trefte land på babord side på veg ut mot open sjø. Skadene på baugen var godt synlege då ferja kom mot kai igjen.
– Situasjonen er under kontroll. Ferja går tilbake til kai for eiga maskin, meldte HRS.
– Eit skikkeleg vindkast
Innsatsleiar på staden, Frank Listøl i politiet, fortel at årsaka til grunnstøytinga var sterk vind.
– Ferja fekk eit skikkeleg vindkast i sida. På den måten mista ferja retning, grunnstøytte og fekk skadar på thrustarene. Ferja mista dermed også moglegheitene til å navigere og slapp anker for å vente på slepebåt.
Listøl fortel at politiet snakkar med mannskapet på ferja og gjer undersøkingar saman med brannvesenet.
– Kapteinen er i avhøyr med politiet og bekreftar at vinden sette ferja ut av drift.
Det er bestilt både dykkarar og undervassrobot for å sjå skadeomfanget på ferja under vassoverflata.
– Sjøfartsdirektoratet er på veg for å undersøke fartøyet før det kan forlate kaien, seier kommunikasjonsdirektør Marianne Frønsdal i Norled.
Gjekk på land på veg til Fedje
Ifølge reiarlaget Norled var det 15 passasjerar og eit mannskap på sju om bord. Ingen skal ha blitt skadd i grunnstøytinga.
Anne Koppang var ein av passasjerane på ferja. Til BT fortalde ho at ferja køyrde inn i fjellsida på ei øy på veg ut frå Sævrøy kai.
– Vi høyrde fleire kraftige dunk og vart sjølvsagt vettskremde. Me har fått på oss redningsvestar og ligg no utanfor ferjeleiet og ventar på ein losbåt, fortel Koppang til NRK.
– Hol i skroget
Norled seier dei er i dialog med mannskapet og passasjerane på ferja. Koppang seier dei fekk beskjed på ferja om at det var gått hol på eit av skroga på ferja.
– Me forstår at dette kan oppfattast som svært dramatisk for dei reisande og det beklagar me sterkt, seier Frønsdal i Norled.
Skyssbåt fraktar passasjerar
Det er berre ei ferje som trafikkerer sambandet Fedje – Sævrøy, så alle avgangar er naturleg nok inntil vidare innstilt.
Det blir sett opp skyssbåt for transport av passasjerar. Første båt hadde avgang frå Sævrøy klokka 12.30.