Ein eventuell streik frå måndag vil få store konsekvensar om 11 000 statstilsette og mange tusen kommunalt tilsette legg ned arbeidet.
Skular og barnehagar kan bli stengt, og streiken vil også råke tilsette i alt frå fengsel, vegvesen, tollstasjonar og domstolar.
Direktør Harald Åsaune i Bjørgvin fengsel i Bergen er ein av dei som fryktar konsekvensane av ein eventuell streik.
– Det vil føre til store belastningar for den enkelte innsette. Enno verre er det kanskje at det kan føra til uvisse og risiko for andre råka.
Førre streik enda med lovbrot
Om det blir streik og kva konsekvensar det får for fengselet, veit han ikkje
før natt til måndag. Men direktøren i Bjørgvin fengsel snakkar av erfaring.
For to år sidan fekk streiken store følgjer då fengselet opplevde åtte alvorlege brot på permisjonen nokre av fangane fekk.
– Fem personar vart fengsla for ny kriminalitet, der eitt av tilfella var ein valdsepisode, forklarar Åsaune.
- SLIK RÅKAR STREIKEN: Sjå heile oversikta for Oslo | Sjå heile oversikta for Bergen | Desse skulane og barnehagane blir ramma
– Skapar press på arbeidsgjevar
– Viss vi tar den tunge slutninga om å ta ein konflikt, så ynskjer vi å få staten tilbake til forhandlingsbordet så fort som mogleg, seier forhandlingsleiar Pål N. Arnesen i YS.
– Og då må vi ta ut områder som er synlege og skapar eit ekstra press på arbeidsgjevar.
I dag har partane i stat og kommune levert listene til riksmeklaren over dei mange som kan trekke på seg streikevestar i neste veke. Verken regjeringa eller kommunane vil kommentere saka medan meklinga går føre seg.