EKTE SVERD: – Det er veldig viktig at ein kjenner seg trygg, for hvis ein er redd for å bli skada, så øydelegg det mentaliteten din litt, seier Kristine Konsmo.
Foto: Tim Wassmo / NRKNår fektarar møtes til duellar i Bergen denne helga, så brukast det ekte sverd i staden for kårder. Sporten blir kalla HEMA, eller blankvåpen-fekting. Som sport er det ganske nytt, sjølv om opphavet er ganske historisk.
HEMA står for Historical European Martial Arts.
– Det er ei gjenskaping av gammal europeisk kampsport, seier Thomas Nyløkken, leiar i fekteklubben Frie Duellister i Bergen.
Dei starta opp som ein utløpar av miljøet «Kongshirden anno 1260», som driv våpenkamp med kostymer. Frie Duellister er Noregs største HEMA-gruppe, og har no fått utløparar i Oslo og Tromsø.
– Kan ikkje vera redd for å bli skada
PIONER: Thomas Nyløkken leiar fekteklubben Frie Duellister.
Foto: Tim Wassmo / NRKI helga møtest kring 50 deltakarar frå sju ulike land til konkurranse på Landås i Bergen. Ein av dei som skal i elden er Kristine Konsmo (28).
– Det er ein veldig gammal sport, og det har døydd litt ut. Vi har halde på med dette ganske lenge, og det er veldig spennande å vera nokon av dei første som bygger opp ein sport heilt frå botn av, seier ho.
Sporten har utvikla seg dei siste ti åra i Noreg, og noko lenger i utlandet. Fektinga går føre seg med ekte våpen i staden for sportskårde, som olympisk fekting brukar. Utgangspunktet for sporten er fektemanualar frå mellomalderen og fram til renessansen.
– Det er veldig viktig at ein kjenner seg trygg, for hvis ein er redd for å bli skada, så øydelegg det mentaliteten din litt, seier Konsmo, som samanliknar HEMA med ein annan idrett som har vokst kraftig i popularitet i Noreg dei siste åra.
– Det er litt som å spela sjakk. Ein skal vera på heile tida, og tenka på kva motstandaren gjer. Det er både fysisk og mentalt krevjande, seier Konsmo.