– Eg pleier å sitte her sånn at eg ser når bussen kjem!
Amalie Taranger Litlabø går i 2. klasse ved Litlabø skule på Stord. Ved vegen er det ikkje noko busskur, så ho har stått ute i allslags vêr og venta.
Men sist veke kom farfar, Svein Litlabø, trillande ned til vegen med ei overrasking, skriv avisa Sunnhordland.
– Me har jo hatt skuleungar sjølv her, men det har aldri vore noko busskur. Som far og no bestefar har det vore vondt å sjå på dei stå ute i regnet.
Gamal hestekjerre
Han tok ei gammal hestekjerre han hadde ståande og byrja snikra. Etter eit par-tre dagar var det vesle raudmåla huset klart.
Namnet på skuret har blitt «bussventaren», med eigen benk, store vindauge og kvitmåla lister.
Høyr radiosaka om Amalie her:
– Eg trudde det skulle bli eit heilt vanleg busskur. Eg visste ikkje at busskuret skulle bli lagd ut av ei hestevogn, seier Amalie oppglødd.
– Men ser bussen deg når du sit her?
– Når eg ser bussen då går eg ut av busskuret og bort til vegen.
– Og kva sa bussjåføren då han såg busskuret?
– Han sa: Så fint busskur du har, seier Amalie og smiler.
- Les også: Skapte unikt bilete med 400 skuleborn
Manglar busskilt
Farfar har planta blomar rundt skuret, og laga to steintroll til det unike busstoppet. Men pyntinga er ikkje ferdig.
– Det hadde vore frykteleg kjekt å få på plass eit skikkeleg skilt til å henge opp som viser at det er eit busstopp. Kanskje vi finn noko som kan brukast.
Og om du lurte: Det er ikkje berre Amalie som kan bruke busskuret.
– Det er til bruk for alle som soknar til det, seier farfar Svein.