SISTE: Det ble ingen streik. Les meir her.
For sjette gong på rad gjekk lønnsoppgjeret i buss i år til mekling. Meklinga som starta i går er mellom Yrkestrafikkforbundet (YTF), Fagforbundet, Transportarbeiderforbundet og Norsk Jernbaneforbund (NJF) på arbeidstakarsida og NHO Transport og Spekter (Nettbuss) på arbeidsgivarsida.
3400 bussjåførar vil vera i streik frå måndag av viss partane ikkje blir einige, og det er følgjande område som vil bli ramma:
- Heile Rogaland (Boreal Transport Sør og Tide Buss)
- Bergen, Os, Hardanger og Voss i Hordaland (Tide Buss)
- Store delar av Østfold (Nettbuss Øst)
- Store delar av Hedmark og Oppland (Nettbuss Øst)
- Delar av busstrafikken til og frå Gardermoen i Akershus (Nettbuss Øst)
- Delar av Telemark og Agder (Drangedal Bilruter og Setesdal Bilruter)
Fristen ute
Riksmeklar Kine Steinsvik seier søndag kveld klokka 23.00 at det framleis står att ein del før partane kan komme til semje i bussmeklinga.
Og måndag morgon klokka 05.00 sit framleis partane i forhandlingar. Det er dermed uavklart om det vert streik for 3400 sjåførar.
– No går meklinga framleis for lukka dører. Statusen er at partane har komme nærare kvarandre på noko punkt. Men det er for tidleg om vi er nærare ei løysing, sa Steinsvik til NRK seint i går kveld.
Ho legg til at forhandlingsklimaet er godt og at alle partar jobbar konstruktivt.
– Men eg vil ikkje gå inn på dei konkrete drøftingane.
– Må folk førebu seg på å finne andre måtar å ta seg fram på enn buss måndag?
– Folk må følgje med i media, så får vi sjå om det er aktuelt å gå over fristen i natt for å mekle vidare.
Går som normalt
I Hordaland opplyser Skyss at bussane går etter ordinære ruter måndag morgon.
I Rogaland skriv Kolumbus på sine sider at om ikkje partane kjem til einighet i løpet av morgontimane, kan du ta utgangspunkt i at bussane går frå morgenen av. Dei held folk oppdatert mellom anna på sine Facebook-sider.
Informerer dei reisande
Selskap som organiserer og driftar kollektivtransporten i desse områda har lagt ut informasjon til kundane sine på sine nettsider, der dei opplyser om kva ruter som blir ramma og kva som skjer viss det blir streik. Denne informasjonen finn du her:
Kolumbus (Rogaland) | Skyss (Hordaland) | Ruter (Akershus) | Nettbuss Øst (Akershus, Østfold, Hedmark og Oppland) | AKT (Agder) | VKT (Telemark)
- LES OGSÅ:
Handlar i stor grad om lønn
Før meklinga starta i går uttalte forhandlingssjef Henrik Dahle i YTF til NTB at dei forventa harde forhandlingar.
NTB melder at avstanden mellom partane er stor og at strida i stor grad handlar om lønn. Arbeidstakarane krev same lønnsutvikling som industriarbeidarane, medan NHO Transport viser til at ramma er 3,3 prosent, som ved frontfaga.
– Det var diverre ikkje mogleg å komma til semje i forhandlingane. Arbeidsgivarsida har heile tida fasthalde at oppgjeret måtte ligga innanfor frontfaga sine rammer, men arbeidstakarorganisasjonane kravde eit langt dyrare oppgjer, sa forhandlingsleiar og administrerande direktør Jon H. Stordrange i NHO Transport til NRK før meklinga starta.
Har teieplikt
Frå arbeidstakarsida blei det før meklingsstart meldt at arbeidsgivarane skuffande valde å ikkje legga fram eit økonomisk tilbod under forhandlingane før påske, og at dette førte til at forhandlingane blei brotne. Dette opplyser kommunikasjonsansvarleg Ida Langdalen Kristiansen i YTF.
Det YTF ifølgje Kristiansen forhandlar om er kompetanseutvikling for sjåførane, ein arbeidsdag å leva med og lønn meir på linje med industriarbeidarlønn.
Partane i saka kan ikkje uttale seg til media så lenge meklinga går føre seg.
