I byrjinga av februar fann politiet 243 hasjplanter i ein einebustad på Ask i Askøy kommune.
Det skriv avisa Askøyværingen.
– Dette er nok eitt av dei største beslaga av hasj i kommunen, seier politioverbetjent Kjell-Bjørn Heggøy, ved Askøy lensmannskontor til avisa.
To sikta
To menn av utanlandsk opphav er sikta i saka.,
– Ein person vart pågripen etter beslaget, avhøyrd og deretter sett fri, medan ein person framleis er etterlyst. Mest sannsynleg har han forlate Noreg.
– For politiet lokalt var plantasjen ganske stor. Nasjonalt vil plantasjen bli rekna som å vera av liten eller mellomstor størrelse.
Marknadsverdien kan ikkje politiet seia noko konkret om endå.
– Plantene er sendt til Kripos for analyse, men det er snakk om eit stort potensial av produksjon i huset.
Skadar på bustaden
– Dei som har leigd bustaden har nok primært brukt den til produksjon av hasj, og har berre budd der i periodar.
Det er omfattande skadar på bustaden,
– Dei har skore ut store hol i golv og vegger for å få ventilasjonssystem og elektrisitet opp å gå i produksjonen, seier Heggøy.
Veit ikkje kor lenge det har pågått
Diverse brukarutstyr er beslaglagt i huset.
– Me har funne varmelampar, dyrkingstelt, vifter, luftslangar og diverse filter, seier Heggøy.
Politiet veit ikkje kor lenge produksjonen har pågått.
– Me jobbar for å kartlegga dette opp mot dei som har leigd ut bustaden. Me har framleis ein del etterforsking att.
Om saka kjem opp for domstolen har den ei strafferamma om lag to år, ifølge politiet.