Eittåring måtte overnatte på sjukehus etter Trolltunga-tur

På det verste har hjelpemannskapa rykka ut fleire gongar om dagen til Trolltunga i Odda denne sommaren.

Laurdag hadde redningsmannskapa fire aksjonar. No fortel dei meir om ein av det mest dramatiske; ei britisk mor og hennar eitt år gamle son som fekk problem på turen ned igjen.

– Eg har aldri sett noko slikt før, heldigvis. Ein så liten gut i beremeis i 10-12 timar med dårleg utstyr. Det var på kanten, seier leiar Knut Atle Øyre i Tyssedal Røde Kors.

Forfrysing

Redningsoppdraget var sjeldan kost, sjølv for ein som har arbeidd som redningsmann ved Trolltunga i kring 20 år.

– Då vi kom fram, hadde dei teikn til forfrysing, begge to. Spesielt barnet, som var heilt bleik, byrja å bli blå og skalv. Han var ikkje kledd for turen, fortel Øyre.

Han seier at tilfeldige forbipasserande hadde lånt dei ullplagg for å få varmen i barnet. Vidare hadde dei tatt med mora og sonen til ei hytte i nærleiken, der dei pakka guten inn i teppe.

• Her blir utmattede turister reddet ned fra Trolltunga midt på natten

Skryt til hjelparane

– Eg hadde stor medkjensle med mora. Ho var svært sliten, og fortvila over situasjonen. Ho trudde ikkje turen var så lang.

Mora og sonen hadde lagt i veg mot Trolltunga tidleg på laurdagsmorgonen, og hadde tre kilometer att på tilbaketuren då dei fekk hjelp av andre turgåarar.

– Det er langt ifrå noko eg hadde utsett mine born for. Ein skal gjere alvorlege vurderingar på om barnet er i stand til å sitje i beremeis i 10-12 timar før ein legg ut på denne turen, seier Øyre.

Han skryt av dei som hjelpte til.

– Det er særs viktig at vi tek vare på kvarandre i fjellet, og hjelper til når nokon har behov for det.

Overnatta på sjukehus

Då hjelpemannskapa returnerte til Skjeggedal med mora og sonen, vart eittåringen tatt hand om av helsepersonell.

Helse Fonna opplyser til NRK at guten først vart frakta til legevakta, før han vart send vidare til Haugesund sjukehus for observasjon over natta.

Søndag morgon vart han skrive ut.

Blir ikkje oppretta sak

Områdeleiar Bjørn Arild Fjeldsbø i Røde Kors påpeiker at Odda kommune fleire stader har sett opp skilt som seier korleis ein bør vera utstyrt og kledd når ein legg i veg mot Trolltunga.

– Dei er ikkje til å misforstå, påpeiker han.

Politiet har diskutert å oppretta sak etter hendinga, men lensmannen i Odda fortel at dei har avgjort å ikkje gå vidare.

– Vi var ikkje på staden då dei blei henta ned frå fjellet, og har såleis ikkje faktagrunnlaget som trengst for å opprette ei sak. Vi har heller ikkje mottatt noko melding om til dømes omsorgssvikt frå legen som undersøkte dei, fortel Terje Kvalvik.