– Vi har vore meir spente enn vanleg på søkjartala ut ifrå korleis arbeidsmarknaden har sett ut dei siste månadane, seier inntaksleiar Nils Skavhellen i Hordaland fylkeskommune.
Søknadsfristen til dei vidaregåande skulane i Hordaland gjekk ut 1. mars, og i dag vart prognosetala for 2016 offentleggjort.
Sjå heile oversikta over alle skulane i Hordaland i tabellen nedst i saka.
Frå 200 til 22 søkjarar
Oljerelaterte fag, som teknikk og industriell produksjon, merkar at det er dårlege tider i bransjen. Dei fått den største reduksjonen i søkjartala.
Bergen Maritime vidaregåande skole er den skulen i Hordaland som har fått størst nedgang i søkjartal med 156 færre elevar enn i fjor.
– Det er spesielt til utdanninga brønnteknikk vi har nedgang. I fjor søkte over 200 elevar til 30 plassar, medan det i år berre kom 22 søkjarar, seier Skavhellen.
Mest populære
Amalie Skram vidaregåande skule er også i år den mest populære skulen i Hordaland, med 1787 søkjarar. Så følgjer Knarvik vidaregåande skule med 1203 og Nordahl Grieg vidaregåande skole med 1162 søkjarar.
Slåtthaug vidaregåande skole har hatt størst auke i talet på søkjarar med 152 fleire enn året før, medan Bergen Katedralskole aukar med 119 søkjarar.
– Det er ei veldig stor auke på Slåtthaug, og vi har ingen god forklaring for kvifor skulen har fått så stor auke i søknaden, seier Skavhellen.
Friluftslivet lokkar
Utanfor Bergen er Nye Voss vidaregåande skule mellom dei som opplever gode søkjartal.
– Naturbruk med friluftsliv og villmarksliv på Voss har fått eit enormt stort søknadstal i år, seier Skavhellen.
I fjor var det 14 elevar som søkte seg til linja, medan talet i år er på heile 55 elevar. Rektor Svein Inge Styve er svært overraska.
– At det har blitt nesten 60 søkjarar på dei 20 plassane er over all forventning og veldig kjekt, seier Styve.
Nye Voss vidaregåande skule er ei samanslåing av Voss jordbruksskule og Voss vidaregåande skule. Det nye skulebygget på Skulestadmo opnar til hausten.
– Ein heilt ny skule er ofte magnet i seg sjølv, men vi har eit godt rykte på undervisninga på linja, og det er ei generell auke i interessa for villmarksliv og friluftsliv i ungdomsgruppene som kan vera grunnen til at linja er populær, forklarar rektoren.
E-sport
Foreløpige søkjartal for Fana private gymnas er også offentleggjort, der 160 ungdommar har søkt seg til 340 plassar, ifølge Fanaposten.
Det nye e-sportsfaget på Garnes vidaregåande lokkar også ungdommar, og skulen melder at dei ikkje har hatt betre søkjartal sidan 1990-talet. 128 personar har Garnes som førsteval til hausten.