Politiet fekk klokka 17.45 onsdag ettermiddag melding om eit ras ved Stanghelletunnelen på E16 mellom Bergen og Voss.
Det er ikkje meld om personskadar, ifølgje politiet.
Raset har gått i tunnelmunningen på austsida av tunnelen. Reisande må køyra om Riksveg 7, gjennom Hardanger, for å komma seg mellom Bergen og Voss.
Rasar framleis
Rapportane frå Stanghelle går ut på at det er meir lause massar i fjellsida.
– Patruljen vår melder om at det framleis rasar oppi fjellsida, seier Ole Jakob Malmo, dom er operasjonsleiar i Hordaland politidistrikt.
Opnar ikkje i dag
Vegvesenet opplyser om at det ikkje er aktuelt å opna europavegen igjen onsdag. Det er andre gong på kort tid at tunnelen vert stengt grunna ras.
– Raset har gått på omlag samme plass, som det gjekk eit ras for ei veke sidan, seier Morten Hansen, trafikkoperatør i Statens vegvesen.
Også vegvesenet stadfestar at det held fram med å detta ned stein på rasstaden.
– Når entrepenøren vår var nede sa han at det held fram med å rasa, seier Hansen.
Geologen er varsla og reiser truleg til rasstaden i kveld. Tidlegare på dagen onsdag fall store steinar ned i vegbana på fylkesveg 569 i Vaksdal.