– Asylborna er dei aller mest sårbare vi har i Noreg, sa nestleiar Åsmund Aukrust i AUF under støttemarkeringa i Oslo i dag.
Markering i fleire byar
Både i Oslo, Bergen og Tromsø har det vore støttemarkeringar for dei 450 asylborna i Noreg. Ei rekkje politiske parti og organisasjonar deltok i markeringane.
Felles for asylborna er at dei framleis ventar på ei endeleg avklaring på framtida, sjølv om dei har budd her i landet i mange år.
– Desse borna er blitt like norske som eg er. Vi krev at dei får saka si behandla på nytt, og at borna sitt beste alltid skal leggjast til grunn, seier Åsmund Aukrust i AUF til NRK.no.
Skal opp i Høgsterett
Sjuåringen Nathan Eshete frå Bergen er blitt eit symbol på asylborna.
Familien hans har gått til rettssak mot staten, etter at dei fekk avslag på opphaldsløyve.
Rettssaka skulle ha starta i Oslo tingrett i dag, men fordi Høgsterett om kort tid skal behandla for Nahtan og andre asylborn.
Saka skal behandlast i plenum, altså med alle dommarane til stades, og det er første gang ei utlendingssak kjem opp til plenumsbehandling i landets øvste domstol.
Skjønn eller ikkje?
Høgsterett skal avgjera om norske styresmakter får utvisa skjønn i asylsaker eller ikkje.
– Viss denne anførselen fører fram, så vil vedtak av Utlendingsnemnda (UNE) oftare bli overprøvd av domstolane, seier høgsterettsdommar Magnus Matningsdal.
Han seier det generelt sett vil bety større sjanse for asylsøkjarane til å få medhald i sine søknader om opphald.
Det er venta dom i Høgsterett-saka rundt juletider.
SYMBOL: Nahtan (7) frå Bergen er blitt eit symbol på dei mange hundre asylborna. Bildet er frå 1. mai-markeringa i Bergen, der statsminister Jens Stoltenberg deltok.
Foto: NRK
