NRK Meny
Normal

Byar kan få lov til å forby dieselbilar

Regjeringa vurderer å støtte forslaget om å forby dieselbilar å køyre på dagar med høg luftforureining.

Tett trafikk over Danmarksplass

Venstre vil at byar skal få lov til å forby dieselbilar å køyre på dagar med høg luftforureining, og regjeringa vurderer å støtte forslaget.

Foto: Åge Algerøy / NRK

Ola Elvestuen (V)

– Dieselbilar er det største problemet, seier nestleiar i Venstre, Ola Elvestuen.

Foto: Kallestad, Gorm / SCANPIX

Venstre foreslår å la byar forby dieselbilar å køyre på dagar med høg luftforureining, og regjeringa vurderer no å støtte forslaget.

– Dieselmotorar er hovudproblemet når det gjeld lokal luftforureining. Då må me ha tiltak som går direkte mot dei, seier Ola Elvestuen, nestleiar i Venstre til Bergens Tidende.

Det største problemet

Fleire parti har tatt til orde for at dieselbilar skal kunne betale meir i bompengar enn andre bilar. Venstre går altså enda lenger i sitt forlag, og vil gje kommunane moglegheit til å nekte dieselbilane å køyre i det heile tatt på dagar med mykje forureining.

Dieselbilar har langt høgare utslepp av NOx enn bensinbilar.

– Miljødifferensiering er eit meir langsiktig verkemiddel, og fjernar ikkje utsleppa når situasjonen er akutt. Det er kommunen som er ansvarleg for å sørgje for god luftkvalitet for borgarane, seier Elvestuen.

Bergen hadde sitt kriseår med luftforureining i 2010. I år kom ei reisevaneundersøking som viser nedgang i biltrafikken for første gang sidan 60-talet.

Regjeringa vurderer å støtte forslaget

Statssekretær John-Ragnar Aarset (H) i Samferdsledepartementet seier dei ikkje har drøfta Venstre sitt forslag konkret, men at ein del av problemstillingane er på blokka.

– Me har sett ned ei arbeidsgruppe leia av Klima- og miljødepartementet. Både miljødifferensierte bompengar, lågutsleppsone og eit mogleg dieselforbod er blant tiltaka me vurderer, seier Aarset.

Trur på fleirtal i bystyret

Erlend Horn

Erlend Horn (V) trur opposisjonen vil samle seg om ein meir offensiv miljøpolitikk i Bergen, og vil foreslå at bystyret vedtek den strengaste versjonen av regelverket.

Foto: Sølve Rydland

Erlend Horn (V) seier at så snart det er mogleg vil Venstre i Bergen foreslå at bystyret vedtek den strengaste versjonen av regelverket.

– No har me eit mindretalsbyråd, og då er det håp om å få til ein meir offensiv miljøpolitikk. Me reknar med at me kan samle opposisjonen, inkludert KrF, om desse forslaga, seier Horn.

Arbeidsgruppa leia av Klima- og miljødepartementet skal levere sitt arbeid tidleg på hausten, deretter skal saka til politisk behandling.

Siste video

Distriktsnyheter fra Hordaland og Sogn og Fjordane
Erna Solberg med fremføring av "Nystemten" og Ketil Solvik-Olsen på tuba var en del av den offisielle åpningen av Bergens nye flyplass.
Se hele arbeidet med å fjerne flytedokken fra Foto/redigering: Tim Wassmo