NRK Meny
Normal

Skal ha ni brannfolk på staden i heile natt

Dei evakuerte må halda seg vekke til i morgon på grunn av gassflasker og dynamitt i brennande løe. Brannvesenet skal ha ni mann på brannstaden i natt.

Ni evakuerte må halda seg vekke til i morgon på grunn av gassflasker og dynamitt i brennande løe.

VAKTHALD: Politiet held vakt for å passa på at ingen kjem for nær brannstaden (Foto: Kjartan Lægreid/NRK).

Klokka 14.15 melde 110-sentralen i Hordaland om brann i ei løe i Vikavegen i Lindås.

Ni personar er evakuert frå dei tre næraste husa, og det har vore fleire eksplosjonar frå branntomta i løpet av ettermiddagen. Verken folk eller dyr har kome til skade i brannen.

Politifolk på staden held vakt for å passa på at ingen kjem for nær den brennande bygningen.

Brann i løe i Lindås

TRE HUS EVAKUERT: Dei som bur i husa nærast brannstaden er evakuert, og får ikkje flytta heim før i morgon.

Foto: Kjartan Lægreid / NRK

Dynamitt og gassflasker

Brannvesenet fekk tidleg mistanke om at det kunne vera både dynamitt, gassflasker og drivstoff inne i løa. Seinare fekk dei stadfesta mistanken.

– Det er sprengstoff og gassflasker med oksygen, acetylen og propan i bygningen, seier vakthavande sjef i Lindås og Meland brannvesen, Ståle Hauge, til NRK.no.

Dei har hatt hjelp frå Austrheim brannvesen, og på det meste var 26 brannfolk i sving på staden etter at alarmen gjekk i 14-tida.

– Vi observerte ein relativt stor eksplosjon i 15-tida, og elles har det vore nokre mindre eksplosjonar, seier brannsjefen.

Ny vurdering i morgon tidleg

Brannvesenet skal ha ni brannfolk på staden heile natta.

– Vi skal kjøla ned gassflaskene gjennom natta ved å spyla vatn på dei. Når det blir lyst i morgon tidleg tar vi ei ny vurdering, seier Hauge.

Det er fare for at det kan koma nye eksplosjonar, og då er det viktig å ha nok folk på staden.

– Vi må vera parat viss nye eksplosjonar gjer at det oppstår fare for andre bygningar i området, seier brannsjefen.

Evakuering til i morgon

Sidan det blei klart at ingen får flytta tilbake i kveld, har politiet arbeidd med å skaffa overnatting til dei evakuerte.

– Det pågår no kontrollert nedbrenning. På grunn av mogleg eksplosjonsfare vil vi ikkje senda folk tilbake før alt er brent heilt ned. Difor prøver vi no å skaffa overnatting til dei ni evakuerte, seier operasjonsleiar Kjersti Eidsnes i politiet.

Ho stadfestar at løa blir brukt til hestar, men at det ikkje var hestar i bygningen då brannen starta.

Årsaka til brannen er så langt ikkje kjent.

Laster kart, vennligst vent...

Siste video

Distriktsnyheter fra Hordaland og Sogn og Fjordane
Erna Solberg med fremføring av "Nystemten" og Ketil Solvik-Olsen på tuba var en del av den offisielle åpningen av Bergens nye flyplass.
Se hele arbeidet med å fjerne flytedokken fra Foto/redigering: Tim Wassmo