– Nært er fint, seier bergensaren Tor Berge.
Saman med turkamerat Fredrik Taule vurderte han å reise til Voss på søndag, men då dei oppdaga at det skulle vere fint skiføre på Vidden blei planane endra.
I videoen øvst i saka kan du sjå korleis Vidden spigle seg i sol på søndag.
– Ein går opp med utsikt til byen heile vegen, og kjem over kanten og får sjå ei kvit vidde i kontrast til den fine hamnebyen Bergen. Det er ei god oppleving, seier Berge om turen.
– Ei helg utanom det vanlege
Berge brukar så mange timar som mogleg i fjellet. I løpet av fire timar la han bak seg 22 kilometer i skisporet på søndag.
– Ein tar skiene på ryggen opp, så er det flatt og fint å gå over Vidden. Det kan verkeleg anbefalast, seier Berge.
– 22 kilometer på fire timar, det er kanskje ikkje ein familietur?
– Ein treng ikkje gå heile runden, men kan fint gå ned fleire andre stadar eller litt innover Vidden og tilbake.
- Les òg:
Berge er svært nøgd med vêret, men trur denne helga har vore eineståande denne vinteren.
– Dette var vel første og siste helga med slikt fint vintervêr, kjenner eg Bergen rett, seier Berge med eit smil.
– Det blir mildvêr
Den erfarne skigåaren ser ut til å kjenne byen sin, for ifølge meteorolog Ingrid Bentsen ved Meteorologisk institutt er det mildvêr på veg.
– I dei lågare fjellområda i Bergen kan det bli pluss fem grader i dagane framover. Temperaturen vil stige, og det blir nedbør, seier Bentsen.
Ho ser ingen fleire fine vinterdagar i sikte for bergensarane foreløpig.
– Det er lågtrykk etter lågtrykk som vil kome, og det blir grått vêr og nedbør i alle fall i ei veke.
- Les òg:
Skientusiasten Tor Berge oppmodar likevel alle til å legge ut på tur, dersom vêret skulle tillate det fleire gonger i løpet av vinteren.
Sjølv er Berge over gjennomsnittet interessert, og saman med ein kamerat skal han til Grønland i april.
– Det blir oss mot naturen, smiler Berge.
- Les òg: