Det er dagen etter for bilistane som i går segla inn i kvarandre på glatta på E39 i Eidsvåg i Bergen.
60 biler var involvert i massekollisjonen midt i morgonrushet. Vegen blei stengt i fleire timar og trafikken stod bom stille over heile Bergen.
I dag strøymer skademeldingane inn til forsikringsselskapa.
– Det er kompliserte saker når såpass mange er borti kvarandre og er uheldige, seier Arne Voll, informasjonssjef i Gjensidige.
– Skal køyra etter forholda
Han fortel at vanlege reglar gjeld også i ei ulukke som denne, og forklarer korleis ansvaret blir fordelt.
– Bil nummer ein klarar til dømes å stoppa fint utan å få skade. Men så kjem bil nummer to og krasjar inn i bil nummer ein, og bil nummer tre som krasjar inn i bil nummer to. Då er det naturleg at ansvaret blir fordelt på dei to siste bilane.
KAN BLI DYRT: Informasjonssjef i Gjensidige, Arne Voll, seier nokon bilistar må rekna med å betala eigendel og å få bonustap.
Foto: Gjensidige forsikring– Men det var glatt på vegen. Kan bilistane eigentleg lastast for dette?
– I går var det ekstraordinært, men ein skal køyra etter forholda. I går var det mange som var uheldige, det er det ingen tvil om.
– Kan det henda at de kjem til å sjå vekk ifrå normal praksis i dette tilfelle?
– Normalt sett er det reglar for det meste også under spesielle tilfelle. Difor er det viktig at ein tek sak for sak, og gjer ei grundig vurdering for å finna ut kva som har skjedd.
– Ikkje rettferdig
Giske Eggen i NAF meiner det er brutalt at ansvaret skal leggast over på bilistane.
– Forholda var såpass ekstreme denne morninga at det var vanskeleg å vera aktsam nok. Ein skal alltid køyra etter forholda, men når forholda skifta så fort som dei gjorde i går, då kan ein ikkje berre skulda på bilistane, seier ho.
Kven som får sluttrekninga er uklart. Fleire forsikringsselskap NRK har snakka med vurderer å senda rekninga vidare.
Slik såg det ut på skadestaden etter massekollisjonen.
– Viss det visar seg at har vore strødd for lite og for dårleg, kan det vera moglegheiter for at me sender rekninga vidare til Statens vegvesen, seier Arne Voll.
– Sjåføren sitt ansvar
Gunnar Kråkenes ved vegavdelinga i Statens vegvesen understrekar at han ikkje kan uttala seg på juridisk grunnlag, men at han ikkje har erfaring med at dei har tatt rekninga for slike ulukker tidlegare.
– Normalt sett så har sjåføren alt ansvar når han finn seg på ein veg. Vegvesenet gjer ingen garanti opp mot ver og føre, seier Kråkenes.
