- Det var utruleg jamt. Eg hadde ikkje trudd eg skulle vinna, seier Rasmus Helgebostad.
Berre eit par poeng skilte han og andreplassen i regionmeisterskapen i baristakunst i Bergen i går. Ikkje fleire enn fire personar deltok, men nervane var likevel på topp før konkurransen.
- Det var vilt kaos rett før. Det er utruleg mange småting å tenkja på. Det er ikkje berre til å trykka på knappen på kaffimaskina. Det tekniske, kverna, kaffien ein vel, og måten ein pakkar kaffien på: Alt spelar inn på smaken, seier baristakunstnaren.
LES MEIR: Slik lager du god kaffi
Ti minutt på seks kaffiar
I meisterskapen får kvar av deltakarane ti minutt på å laga to espressoar, to cappuccinoar og to sjølvvalde drikker.
- Reint utstyr og ferske kaffibønner er viktig for å få god kaffi. Tida kaffien er i kontakt med vatn, har også mykje å seie, fortel Helgebostad, som til vanleg jobbar på Kaffemisjonen i Bergen.
Den sjølvvalde drikken hans var eplejuice, sukker og espresso kombinert med lyden av kolsyre.
- Eg er veldig opptatt av korleis lyd og smak heng saman. Smaken blir som lyden, fortel han og ler.
Og ganske riktig: Dommarane følte at dei drakk kaffibrus.
- Det høyrest kanskje litt rart ut, men det fungerte veldig bra. Baristakunst handlar om kreativitet og god smak, fortel Anders Dahle, som var dommar i konkurransen.
Ser fram til NM
Det er åtte år sidan regionmeisteren byrja å jobba på kaffebar. Berre tre månader etter var han med i sin første konkurranse.
- Det gav meirsmak. Det er kjekt å perfeksjonera seg og veldig motiverande i arbeidet, fortel han.
Helgebostad har vunne konkurransen seks gonger før, men NM-tittelen har han aldri fått. No ser han fram til finalen.
- Men eg tar det med ro. Plasseringa er ikkje så viktig. Det er meir for personleg utvikling, seier han.
LES OGSÅ: Filterkaffi er sunnest
- Kjøp ei kvern
Den ferske regionvinnaren i baristakunst, eller kaffikoking, har tips til dei som ynskjer betre kaffi:
- Kjøp ei kvern og ferske bønner. Mange kjøper gjerne espressomaskin, men eg vil rå folk til å starta med kverna og så heller ta maskina seinare. Ei kvern gir god smak og er ikkje så dyr, seier han.