Hopp til innhold

Ber om fire veker i varetekt

Politiet ber om lukka dører når den drapssikta 18-åringen frå Os blir framstilt for varetektsfengsling i morgon. 18-åringen blir i kveld avhøyrt for andre gang.

Video Ber om fire vekers varetektsfengling i Os-drapet

SJÅ VIDEO: Politiet ber om fire vekers varetektsfengling i Os-drapet.

Hilda Feste

HILDA FESTE: 98-åringen blei brutalt drepen 1. nyttårsdag.

Foto: Oddmund Lunde

Det opplyser politiet til NRK torsdag ettermiddag.

– I første omgang ber vi om fire veker med brev- og besøksforbod i heile perioden. Vi ber om fullstendig isolasjon og medieforbod i dei to første vekene, seier politiadvokat Ørjan Ogne.

Dei ønskjer lukka dører for å unngå at informasjon som kjem fram i retten skal koma ut i media.

Den sikta blir framstilt for varetektsfengsling i Nordhordland tingrett i Bergen fredag klokka 10.

– Har nok bevis

– Vi har nok bevis til å knytta han til åstaden. Det er forskjellige typar bevis. Vi har nok bevis til å konkludera med at han mest sannsynleg er gjerningsmannen, seier Ogne.

18-åringen frå Os blei pågripen tysdag kveld, og sikta for forsettleg drap på Hilda Feste (98) i omsorgsbustaden hennar 1. nyttårsdag.

Han bur i same nabolag som Feste, og skal ha blitt sett av to vitne som gjekk tur saman i området like før drapet skjedde.

Nytt avhøyr i kveld

Politiadvokat Ørjan Ogne

KAN BLI UTVIDA: Politiadvokat Ørjan Ogne seier siktinga kan bli utvida.

Foto: Aleksander Vollevik Larsen / NRK

18-åringen blir no avhøyrt på nytt.

– Det andre avhøyret med klienten min startar klokka 16 i ettermiddag. Det vil truleg halda på ei stund utover kvelden, seier forsvarar Rolf Knudsen til NRK.

Klokka 20.40 i kveld pågår framleis avhøyret av den sikta på politihuset i Bergen.

Den sikta har sagt at han ikkje forstår at han kan ha noko med drapet å gjera.

Han har forklart at han på drapskvelden var sterkt rusa etter å ha drukke alkohol tidlegare på dagen, og at han ikkje huskar noko frå kvelden og natta .

Siktinga kan bli utvida

Etterforskninga held fram med full styrke, blant anna ved at politiet går gjennom overvakingskamera.

– Han kan finnast på overvakingskamera. Politiet går no gjennom alt av materialet for å sjå om dei finn han igjen. Vi har gjort dette før, men no veit vi kva vi ser etter, seier Ogne.

Han vil ikkje kommentera om 18-åringen er avhøyrt om seksuelt misbruk. Men han utelukkar ikkje at siktinga kan bli utvida.

– Siktinga kan bli utvida. Det er muleg at det skjer allereie før fengslingsmøtet i morgon, seier han.

Ransaker boligen til den siktede

RANSAKING: I går blei heimen til 18-åringen ransaka av kriminalteknikarar og ein spesialtrent hund.

Foto: NRK