– Når eg ser alle andre som er så opphengde i mobilen, så vert eg redd for å verta sånn sjølv, seier Hanna Gullbrå.
20-åringen kjenner på eit press til å følgje med på alt som skjer på sosiale medium.
Men no skal ho droppa mobil og data i sju dagar. Ho er del av ei ny trend blant unge kristne:
«Faste» frå skjermen.
Tradisjonelt har kristne fasta frå mat i 40 dagar før påske. No er det måtehald med mobil, data og internett som gjeld.
Meiner alle kan ha godt av faste
Ein NHH-studie frå 2015 syner at nordmenn i snitt sjekkar mobilen kvart sjette minutt. Altså 150 gongar i døgnet.
Det er organisasjonen Tro og medier som står bak kampanjen «Skjermfri», som Hanna Gullbrå og fleire deltek i.
Dei trur alle, uansett tru og religion, kan ha godt av å faste litt på raude dagar.
– Me har oppfordra til å skru av mobiltelefon, data og fjernsyn i ei veke, utanom jobb og skule, seier kommunikasjonsansvarleg Simen Søvik i Tro og medium.
Han opplever at folk ikkje snakkar saman lenger, og ynskjer å oppfordra til å bruka den skjermfrie tida til vener og familie.
– DROPP MOBIL: Kommunikasjonsansvarleg i Tro og medium, Simen Søvik oppfordrar til å droppa mobil for å fokusera på relasjonane ein har i livet.
Foto: Eva Neteland / NRK– Ein anna ro
Hanna Gullbrå vil heller bruka tida på vener og handarbeid. I tillegg vil ho lesa i Bibelen og be til Gud.
– Jesus er den viktigaste personen i mitt liv, så den relasjonen vil eg halda ved like.
Mobilen ligg på soverommet døgnet rundt.
– Folk har kome i kontakt med meg ved å ringa til venene mine. Så formidlar dei vidare til meg for å gjera ein avtale, seier Gullbrå og ler.
Å vera skjermfri meiner ho har vore utfordrande, men positivt.
– Eg får ein heilt anna ro inni meg. Det er godt å fokusera på andre ting, tykkjer Gullbrå.
ANDRE AKTIVITETAR: Hanna Gullbrå får brodert pennalhuset sitt ferdig.
Foto: Eva Neteland / NRK– Det sit djupare
Brita Ytre-Arne ved Universitetet i Bergen forskar på digital avkopling. Ho kan forstå at enkelte kjenner eit behov for å kutta skjermbruken.
– Eg trur det er tankevekkjande for dei som er prøver å droppa skjermar, men at uheldige sider ved skjermbruken ikkje berre forsvinn ved å gjere dette.
Ho peiker på at samfunnet er lagt opp slik at ein omgjev seg med skjermar. Difor er det nødvendigvis ikkje noko ein berre kan velje vekk.
– Det sitt djupare, og handlar om måten me lever liva våre på, meiner Ytre-Arne.
FORSKAR PÅ AVKOPLING: Brita Ytre-Arne, Førsteamanuensis ved Institutt for informasjons- og medievitskap ved Universitetet i Bergen.
Foto: Eva Neteland / NRK
