– Eg er redd for at det er eit så stort fokus på banestrekningar inn til nærområdet i Oslo, og at om me ikkje står på på Vestlandet, så ryk våre prosjekt til fordel for eit prosjekt på Austlandet, seier Øyvind Halleraker, stortingsrepresentant frå Høgre.
For det har skjedd før. I fjor forsvann fleire titals millioner kroner som skulle nyttast til å utbetra skinnene inn til Bergen stasjon. Dei forsvann til nettopp Austlandet, for der kunne pengane nyttast kjappare.
I går varsla samferdslesminister Magnhild Meltveit Kleppa ei rekkje opprustningar i Oslo-området. Og det får Halleraker til å frykte at det same er i ferd med å skje igjen.
– God fantasi
– Nei, dette er tøv, seier samferdsleminister Magnhild Meltveit Kleppa.
– Ein skal ha sjeldan god fantasi for å trekkje slike konklusjonar. Eg understreker at det er trong for ei opprusting i Oslo-området. Men samstundes skal me altså styrkje fleire andre strekningar, og Bergensbanen spesielt, seier ho.
- Men me har sett før at pengar som er satt av til prosjekt på Vestlandet har forsvunne.
– Ja, det var når dei ikkje hadde signalfolk til Bergen sentrum til Fløen stasjon. Kva gjorde me då? Dei 50 millionane omdisponerte me til arbeid på Bergensbanen.
– Private må inn
Halleraker meiner dei forskjellige prosjekta burde vore sett ut til private selskap, og at det ville skapt fortgang i arbeidet.
– Eg trur diverre at dette er ideologisk grunna. Det er berre i Norge me klarar å gjere dette til eit ideologisk spørsmål, seier han.
Men Kleppa er ikkje einig.
–Halleraker synes framleis å røre seg i ei tid som gjaldt forrige regjering. Dei kutta jo løyvingane til jernbane. No har me store planar om store prosjekt. Og me har som intensjon å fylgje dei opp, avsluttar ho.